ڕاپەڕیوم وا لە کۆڕی بەزمی تێکۆشانەوە
شان بە شانی ڕۆڵەکانی نیشتمانی جوانەوە
من لە نێو کۆڕی خەبات و ڕەنجی بێ پایانەوە
سەر لە پێناوم لە خزمەت خاکی کوردستانەوە
هەڵگری بەیداخی سووری ڕێی شەهیدانم ئەمن

چۆمی خوڕێنی بەهارانم پشوودانم نییە
بێ وچان هەروا دەهاژێم و هەدادانم نییە
من شەپۆلی سەرکەشی دەریام و ئارامم نییە
گەر بە سەربەستی نەژیم من ژینی پەستیم بۆ چییە؟
هاژەهاژی قەڵبەزەی بەفراوی کوێستانم ئەمن

شێری مەیدانی نەبەرد و ڕاپەڕینم هەر بە گوڕ
من بە نرکەم دادەخورپێنم دڵی دوژمن لەپڕ
وێنەیی دارەبەنی پیرم بەدەم کوێستانی چڕ
بازی بێ پەروام ئەمن، پیرەهەڵۆم و بەرزەفڕ
وەک برووسکە و گرمەیی هەوری بەهارانم ئەمن

هەڵکراوی شۆڕشم من کڵپەکڵپی ئاگرم
هەر وەکوو پۆڵا بەرامبەر دوژمنم خۆڕاگرم
من لەسەر داوا ڕەواکەم سوورم و پێداگرم
دەست لەسەر ئامانجی بەرزم بۆ ئەبەد هەڵناگرم
نابەزم پێشەنگی ڕێبازی گەلم مەردم ئەمن

هۆنراوەی عەبدولخالق نەقیب

لە دەسە گەرمەکانی تۆ
کە منداڵی ئاوەڵدوانەی ناو باوەشمن
چیها قسەم پێیە بیکەم
ئەگەر خەمی نان لێم گەڕێ

لە مێهرەبانیی بێدرێخی گیانی تۆ
مەسیحی دایک ئەی خۆرەتاو
بە سازێکی بێکۆتایی کە هەر تۆ بی
ئەمن نەغمە لەسەر نەغمە سروود ئەڵێم
ئەگەر خەمی نان لێم گەڕێ

کانیاوێک لەناو دڵدا و ئاوهەڵدێرێک لەناو دەستدا
خۆرەتاوێک لە نیگادا و فریشتەیێک لە کراسدا
لە ئینسانێ کە هەر خۆتی هەزار چیرۆک دەگێڕمەوە
ئەگەر خەمی نان لێم گەڕێ

پێویستە هیوا هەمیشە وەک ئەستێرەیێکی پرشنگدار وا بێت بە ئاسمانەوە
هەتا وەکوو تاریکی و شەوەزەنگ زیاد بکات و ئەم زیاتر بدرەوشێتەوە
جا تا خەباتی خوێناویمان هەر بەردەوام بێت هێز نییە هیوا بە کورد ببڕێت

هیوا هیوا هیوا هیوا
هیوا هیوا هیوا هیوا
لە ناو دڵمانا هیوا وا ڕووا
تروسکەی هیوا ناکوژێتەوە
ئاوات و ئامانج هەر ئەژێتەوە
ڕابردوو کە ڕۆی ناگەڕێتەوە
فرمێسکی شادی ناگێڕێتەوە
هیوا هیوا هیوا هیوا
هیوا هیوا هیوا هیوا
لە ناو دڵمانا هیوا وا ڕووا

کاتێ ژێر کەوتی هەرگیز مەسرەوە
سوودی لێ وەرگرە و پیایا سەرکەوە
ڕێگەی خەباتت گەرچی زۆر سەختە
پشتت بە دوژمن هەرگیز مەبەستە
هیوا هیوا هیوا هیوا
هیوا هیوا هیوا هیوا
لە ناو دڵمانا هیوا وا ڕووا

چیمەن هۆ چیمەن هەی هەی چیمەن کەرکووکی
ئەمن چۆن نەمرم چیمەن تۆ بەن بە بووکی

چاوم پڕخوێنە چیمەن پڕ لە گریانە
بە چواردەورمدا وەیڕۆ ئاگربارانە
بە چواردەورمدا هەیڕۆ ئاگربارانە
چیمەن هۆ چیمەن هەی هەی چیمەن کەرکووکی
ئەمن چۆن نەمرم چیمەن تۆ بەن بە بووکی

بەدبەختی بەختم چیمەن هەر نەبڕایەوە
سیاچارەییم دەی دەی دەنگی دایەوە
چیمەن هۆ چیمەن هەی هەی چیمەن کەرکووکی
ئەمن چۆن نەمرم چیمەن تۆ بەن بە بووکی

هیچکەس وێنەی من چیمەن نەکەوێ کۆسی
نەڕوانێ لە شوێن هەیڕۆ کۆچەکەی دۆسی
چیمەن هۆ چیمەن هەی هەی چیمەن کەرکووکی
ئەمن چۆن نەمرم چیمەن تۆ بەن بە بووکی