کێ بێ لە من ماندووتر بێ
من خۆشەویستێکم هەبوو
وەکوو دڵۆپە فرمێسکێک
لە گلێنەی چاوەکانما قەتیس مابوو
لە ڕۆژێکی بەهاری ساڵی حەفتادا
لە چاوەکانم جیا بۆوە

لەو ڕۆژەوە تاکوو ئەمڕۆ
من دێوانەی
ئەو دڵۆپە فرمێسکە بێ سەروشوێنەم
هەرچەند دەکەم جارێکی دی
بۆم ناکرێ بیگێڕمەوە ناو گلێنەم

کێ بێ لە من ماندووتر بێ
من خۆشەویستێکم هەبوو
وەکوو هەناسەیەکی پاک
لە سییەکانما
هێلانەی خۆی چێکردبوو
لە ڕۆژێکی بەهاری ساڵی حەفتادا
وەک باڵندە
تۆرا و سییەکانمی بەجێهێشت

لەو ڕۆژەوە تاکوو ئەمڕۆ
هەرچەند دەکەم ئاخ ناتوانم
ئەو هەناسەی ئاوارەیە
بدۆزمەوە
کۆی کەمەوە
بیگێڕمەوە ناو سییەکانم

Kê bê le min mandûtir bê
Min xoşewîstêkim hebû
Wekû dilope firmêskêk
Le gilêney çawekanma qetîs mabû
Le rojêkî beharî salî heftada
Le çawekanim ciya bowe

Lew rojewe takû emro
Min dêwaney
Ew dilope firmêske bê seruşwênem
Herçend dekem carêkî dî
Bom nakrê bîgêrmewe naw gilênem

Kê bê le min mandûtir bê
Min xoşewîstêkim hebû
Wekû henaseyekî pak
Le sîyekanma
Hêlaney xoy çêkirdbû
Le rojêkî beharî salî heftada
Wek balinde
Tora û sîyekanmî becêhêşt

Lew rojewe takû emro
Herçend dekem ax natwanim
Ew henasey awareye
Bidozmewe
Koy kemewe
Bîgêrmewe naw sîyekanim

وەرە یارم وەرە ئەی تازە یارم
وەرە ئەستێرەکەی شەوگاری تارم

وەرە ئەی شاپەڕی باڵی خەیاڵم
وەرە ئەی شەوچرای ڕووناکی ماڵم
وەرە یارم وەرە ئەی تازە یارم
وەرە ئەستێرەکەی شەوگاری تارم

وەرە خاسەکەوی رام و کەویی من
وەرە ئیلهامەکەی نیوە شەوی من
وەرە ئۆخژنی سینەی پڕ گڕی من
وەرە پیرۆزەکەی بەرزەفڕی من
وەرە ئاونگی سەر پەلکی گوڵی سوور
وەرە ئاورینگی گەرم و مەشخەڵی نوور
وەرە ڕێژنە بارانی بەهاری
وەرە شێعری تەڕی پڕ وردەکاری
وەرە یارم وەرە ئەی تازە یارم
وەرە ئەستێرەکەی شەوگاری تارم

وەرە ئەی نەونەمامی باخی ژینم
وەرە ئەی شاگوڵی مێرگی ئەوینم
وەرە کاروانکوژەی کاتی بەیانیم
وەرە بیرەوەری و ئاواتی جوانیم
وەرە ئەی خەج وەرە ئەی خاتووزینم
وەرە با بەژن و باڵاکەت ببینم
وەرە یارم وەرە ئەی تازە یارم
وەرە ئەستێرەکەی شەوگاری تارم

Were yarim were ey taze yarim
Were estêrekey şewgarî tarim

Were ey şaperî balî xeyalim
Were ey şewçiray rûnakî malim
Were yarim were ey taze yarim
Were estêrekey şewgarî tarim

Were xasekewî ram û kewîyî min
Were îlhamekey nîwe şewî min
Were oxjinî sîney pir girî min
Were pîrozekey berzefirî min
Were awingî ser pelkî gulî sûr
Were awrîngî germ û meşxelî nûr
Were rêjne baranî beharî
Were şê’rî terî pir wirdekarî
Were yarim were ey taze yarim
Were estêrekey şewgarî tarim

Were ey newnemamî baxî jînim
Were ey şagulî mêrgî ewînim
Were karwankujey katî beyanîm
Were bîrewerî û awatî ciwanîm
Were ey Xec were ey Xatûzînim
Were ba bejn û balaket bibînim
Were yarim were ey taze yarim
Were estêrekey şewgarî tarim