site loader
Song image
ئێستا کچێک نیشتمانمە – شێرکۆ بێکەس

By - شێرکۆ بێکەس Şêrko Bêkes

من چیم ئەویست لە نیشتمان
جگە لەوەی کە نانێک و
کە کونجێکی دڵنیایی و
گیرفانێکی بە حورمەت و
مشتێ هەتاوی ئارام و
بارانێکی خۆشەویستیی و
پەنجەرەیەکی کراوەی سەر ئازادی و
عەشقم باتێ

من چیم دەویست لەوە زیاتر و
نەیدامێ
بۆیە ئیتر نیوەشەوێ
دەروازەکەیم شکاند و
چوومە دەرێ بە ئێجگاری چوومە دەرێ

ئێوارەیە و لە سەر جادەی
سەهۆڵەکە ڕاوەستاوم
نیشتمانی کۆن خەریکە دابچێت و ئاوا ببێ

تۆزێکی تر نیشتیمانە تازەکەی خۆم ڕۆزانا هەڵدێ و پێکەوە

وەک دوو پرسیاری نێر و مێ

تازەو و تینوو
کەڵەگەتتر لە دروشم و لە منارە و

چون بای بێباک لە دیوار و
لە جوگرافیایی حەرام و
دیرۆکی ترس هەردوو بە جووت

قۆڵ لە قۆڵی یەکتریدا

گوڵ بە دەم و هەتاو لە چاو

سەربەرەوژوور ئەبینەوە

بۆ ئەو باخچەیەی عەشق و خەونەی

نە زەرد ئەبێ و نە پیر ئەبێ و

نە ئەیژمرێ

Min çîm ewîst le nîştiman
Cige lewey ke nanêk û
Ke kuncêkî dilnyayî û
Gîrfanêkî be hurmet û
Miştê hetawî aram û
Baranêkî xoşewîstyî û
Pencereyekî kirawey ser azadî û
eşqim batê

Min çîm dewîst lewe ziyatir û
Neydamê
Boye îtir nîweşewê
Derwazekeym şikand û
Çûme derê be êcgarî çûme derê

Êwareye û le ser cadey
Seholeke rawestawim
Nîştimanî kon xerîke dabçêt û awa bibê

Tozêkî tir nîştîmane tazekey xom rozana heldê û pêkewe

Wek dû pirsiyarî nêr û mê

Tazew û tînû
Kelegetir le diruşm û le minare û

Çun bay bêbak le dîwar û
Le cugrafyayî heram û
Dîrokî tirs herdû be cût

Qol le qolî yektirîda

Gul be dem û hetaw le çaw

Serberewjûr ebînewe

Bo ew baxçeyey eşq û xewney

Ne zerd ebê û ne pîr ebê û

Ne eyjimirê

کۆپی کردن بێ ئاماژەدان بە سەرچاوە قەدەغەیە
More
Song image
دوا مەنزڵ – شێرکۆ بێکەس

By - شێرکۆ بێکەس Şêrko Bêkes

تۆ هەر بڕۆ هەر بڕۆ
هەتاکوو ئەگەیتە ئەستەموڵ
لە کەنار بۆسفۆردا ژنێکی سێحراوی
لە شێوەی شەهرەزادا ئەبینی
کەمەندێ هەڵئەدا و خۆت لادە و نەتگرێ و
نەتخاتە ناو داوی لەشیەوە و
دەرباز بەو و هەر بڕۆ
هەر بڕۆ
هەتاکوو ئەگەیتە ئەسینا و لە چەقی
سەنتەردا ئەفرۆدیت ئەبینی و ئەیەوێ
بتباتە ماڵەوە بەهێز بە و لا مەدە
هەر بڕۆ هەتا ئەگەیتە پاریس و
لەو شارە شۆخەیشدا تۆ ئەلیزا ئەبینی و
ئەیەوێ بە شیعری ئاراگۆن مەستت کا و
لا بدەی
لا مەدە، هەر بڕۆ
هەر بڕۆ
هەتا ئەگەیتە شاجوانی شارێکی
گوێ زەریا پۆلێ کچی نیوە ڕووت
دێنە سەر ڕێگاکەت باوەشت پیا ئەکەن
حەز ئەکەن بۆ شەوێ بتخەنە ناو سنگ و بەرۆکیانەوە بەهێز بە و لا مەدە و هەر بڕۆ و
هەر بڕۆ
ئەچیتە زەریاوە
تۆ ئەبی بە ماسی و هەر بڕۆ
هەفتەیەک، دوو هەفتە، زیاتریش
نە لە لای مرواری و نە لە لای مەرجان و
نە لە لای ئەستێرە و نە لە لای بەحریش لا مەدە
هەتا ئەگەیتە وشکانییەکانی یو.س.ئەی
هەر بڕۆ هەر بڕۆ و هەتا فێرفاکس
ئەچیتە بەردەمی خانوویەکی دوو نهۆم

لێرەدا لا بدە و سەرکەوە
خۆت ئەکەی بە ماڵێکدا
نە لە ژوور نە لە هۆڵ لا مەدە
ئەمجارە لا بدە و ئەچیتە موبەقێ
خۆیەتی ژنێکی لاوازی سەر لەرزۆک وەکوو پاییز
پێست چرچ و چاوکز و فەقیانە هەڵکراو ئەبینی
شەفیقە سەعیدە، خۆیەتی و
ماچی کە و ماچی کە و
ئەمجارە دانیشە و هەر مەڕۆ

To her biro her biro
Hetakû egeyte estemul
Le kenar Bosforda jinêkî sêhrawî
Le şêwey Şehrezada ebînî
Kemendê heleda û xot lade û netgirê û
Netxate naw dawî leşyewe û
Derbaz bew û her biro
Her biro
Hetakû egeyte Esîna û le çeqî
Senterda efrodît ebînî û eyewê
Bitbate malewe behêz be û la mede
Her biro heta egeyte Parîs û
Lew şare şoxeyişda to Elîza ebînî û
Eyewê be şî’rî Aragon mestit ka û
La bidey
La mede, her biro
Her biro
Heta egeyte şaciwanî şarêkî
Gwê zerya polê kiçî nîwe rût
Dêne ser rêgaket baweşit piya eken
Hez eken bo şewê bitxene naw sing û berokyanewe behêz be û la mede û her biro û
Her biro
Eçîte zeryawe
To ebî be masî û her biro
Hefteyek, dû hefte, ziyatirîş
Ne le lay mirwarî û ne le lay mercan û
Ne le lay estêre û ne le lay behrîş la mede
Heta egeyte wişkanîyekanî U.S.A
Her biro her biro û heta Fêrfakis
Eçîte berdemî xanûyekî dû nihom

Lêreda la bide û serkewe
Xot ekey be malêkda
Ne le jûr ne le hol la mede
Emcare la bide û eçîte mubeqê
Xoyetî jinêkî lawazî ser lerzok wekû payîz
Pêst çirç û çawkiz û feqyane helkiraw ebînî
Şefîqe Se’îde, xoyetî û
Maçî ke û maçî ke û
Emcare danîşe û her mero

کۆپی کردن بێ ئاماژەدان بە سەرچاوە قەدەغەیە
More
Song image
سەعاتەکانی وەڕس بوون – شێرکۆ بێکەس

By - شێرکۆ بێکەس Şêrko Bêkes

لە ماڵەوەم
وەکوو هەموو ڕۆژێکی تر
لەگەڵ “تەنیایی” دانیشتووم.
من لەسەر کورسیەکەی خۆم و
ئەویش لەسەر کورسی خۆی و بەرامبەرم
*
جگە لە خۆی
نایەوێ کەس هاوڕێم بێت،
ئەیەوێ هەر خۆی لە لام بێ،
گەر بنووسم یەک لەدوای یەک
جگەرەم بۆ دائەگرسێنێ و
“خەیاڵ”م ئەکا بە تەیر و تەیر بە شیعر و
شیعریش بەرەو ئاسمانێکی بێ کۆتایی،
هەڵئەفڕێنێ.
*
ژنی بێژەر گەیشتبووە سەر شەقامی
دوا دێڕی ناو هەواڵەکان،
پرتەقاڵی بێژەر وتی:
ئەم ئێوارەیە “زەمین لەرزەیەک”
بە پلەی شەش لەسەر پێوانەکەی ڕێختەر،
دای لە بەشی سەرووی “یابان”،
تووڕە بووم و هاوارم کرد:

زەمین لەرزەی چی ژنەکە؟
زەمین لەرزەی چی پرتەقاڵ؟
بوومەلەرزە… بوومەلەرزە
ئەم زمانەیش هەموو جارێ
بەر بوومەلەرزە ئەکەوێ و
بە پێوانەی… تۆفیق وەهبی و
بە پێوانەی هێمن … هەژار…
شەوێک نییە
لە دوو سێ لاوە … نەڕووخێ.

هاوارم کرد …ئەی پرتەقاڵ،
مەڵێ “یابان”…بڵێ “ژاپۆن”… ژاپۆن
وەکو وڵات
ئەم زمانەیش چی بەسەر هات؟!
لەداخاندا … تەلەفزیۆن ئەکوژێنمەوە،
دیسان تەنیایی دێتەوە و بەرامبەرم دائەنیشێ.

ئەچمەوە سەر کورسیەکەم خۆم،
دیسان تەنیایی دێتەوە و بەرامبەرم دائەنیشێ.
بە لاچاوێ سەیری سەعاتی سەر دیوار ئەکەم،
درەنگ بووە و لە نیوە شەویش لای داوە،
وەکو هەندێ لە سیاسەتمەدارانی
زۆر بێ ئاگای وڵاتەکەم، لەم دنیایە
باوێشکێکی درێژ ئەدەم.
*
وەک زۆر پرۆژەی پاڵکەوتووی چەندین ساڵە،
بە پشتا خۆم ئەکێشمەوە
هەڵئەسم و ئەچمە ژوورێ،
بەڵام بەرلەوەی ڕاکشێم،
بەرامبەر ژنی سەر فەرشی هەڵواسراو
بە ژوور سەرمەوە،
ڕائەوەستم و چاو ئەبڕمە چاوەکانی،
گەردنی بەرز، لووتی قنج و پێستی سپی،
وەک تیایاندا بتوێمەوە وایە.
ژنی سەر فەرش، ئەویش بزەیەک ئەگرێ و
وەک چاوەڕوانی شتێ بێ… چاوەڕوانە

le malewem
Wekû hemû rojêkî tir
Legel “tenyayî” danîştûm
Min leser kursîyekey xom û
Ewîş leser kursî xoy û beramberim
*
Cige le xoy
Nayewê kes hawrêm bêt
Eyewê her xoy le lam bê
Ger binûsim yek ledway yek
Cigerem bo daegirsênê û
“xeyal”m eka be teyr û teyr be şî’ri û
Şî’rîş berew asmanêkî bê kotayî,
Helefirênê.
*
Jinî bêjer geyiştbuwe ser şeqamî
Dwa dêrî naw hewalekan
Pirteqalî bêjer witî
Em êwareye “zemîn lerzeyek”
Be piley şeş leser pêwanekey rêxter
Day le beşî serûy “yaban”
Tûre bûm û hawarim kird:

Zemîn lerzey çî jineke?
Zemîn lerzey çî pirteqal?
Bûmelerze… Bûmelerze
Em zimaneyş hemû carê
Ber bûmelerze ekewê û
Be pêwaney… Tofîq wehbî û
Be pêwaney Hêmin … Hejar…
Şewêk nîye
Le dû sê lawe … Nerûxê

Hawarim kird …ey pirteqal
Melê “yaban”…bilê “Japon”… Japon
Weku wilat
Em zimaneyş çî beser hat?!
Ledaxanda … Telefzyon ekujênimewe
Dîsan tenyayî dêtewe û beramberim daenîşê

Eçmewe ser kursîyekem xom
Dîsan tenyayî dêtewe û beramberim daenîşê
Be laçawê seyrî se’atî ser dîwar ekem
Direng buwe û le nîwe şewîş lay dawe,
Weku hendê le syasetmedaranî
Zor bê agay wilatekem, lem dinyaye
Bawêşkêkî dirêj edem
*
Wek zor pirojey palkewtûy çendîn sale
Be pişta xom ekêşmewe
Helesim û eçme jûrê
Belam berlewey rakşêm
Beramber jinî ser ferşî helwasraw
Be jûr sermewe
Raewestim û çaw ebrime çawekanî
Gerdinî berz, lûtî qinc û pêstî sipî
Wek tiyayanda bitwêmewe waye
Jinî ser ferş, ewîş bizeyek egrê û
Wek çawerwanî şitê bê… Çawerwane

کۆپی کردن بێ ئاماژەدان بە سەرچاوە قەدەغەیە
More