site loader
Song image
مەهاباد – سمایل سەردەشتی

By - سمایل سەردەشتی Smaîl Serdeştî

مەهاباد ئەی مەهاباد گوڵی سەرتۆپی زەوی
زیاتر لە هەموو خاکێک وەبەر دڵان دەکەوی
چون شاری پێشەوایە هەردەم بە یادی ئەوی
بە ناحەق لە داری دا بە نەعلەت بێ پەهلەوی

سورمە لەبۆ چاوان خاکی بەڕە و کۆڵانت
بەڵگەیە بۆ شانازی هیممەتی لاوەکانت
بوویە بەخت و سەرمەشق بۆ هەموو هاوسێکانت
خۆزگە جارێکی دیکە دەکرابمە میوانت
یەک بە یەک نێوم دەبرد پێکڕا جێگە و مەکانت
یەک بە یەک نێوم دەبرد جێگا بەنرخەکانت

سوار ئەسپی خەیاڵ دەبم بەرەو سابڵاغ دەچمەوە
گەشتی نێو شار لێ دەدەم ئەوجار دەگەڕێمەوە
دەچمە چوارڕای ئازادی ماندووم دەهەسێمەوە

سڵاو لە تاقەدار و کانی مام قەمبەرانت
جێگای ڕاز و نیازن بۆ کیژ و لاوەکانت
مەهاباد لێم قەبووڵ کەی بە دڵ بوومە میوانت

دەچمە سەر داشا مەجید بەرەو مەهاباد دەڕوانم
دەچمە سەر داشا مەجید بەرەو سابڵاغ دەڕوانم
بەڵکوو بێنەوە سەر حاڵ سۆمای هەردوو چاوانم
گەر بێت و لێم قەبووڵ کەی بە دڵ لە لات میوانم
مەهاباد لێم قەبووڵ کەی من فیدای لاوەکانم

سڵاو لە ئەسحابەی سپی مەکۆی زانا و شاعیران
حەقیە بە خۆی دەنازێ ئەوانەی بوونە جیران
شەهید محەمەد ئەمین و هێمن و هەژار سێ بە سێ
لە مێژە بوو چوونە بوونە میوان و هاوسێ
حەفتا و هەشتیش ماملێ ڕۆیی گەر لە کن وان وا هەسێ

هێمن بولبولی گەل بوو هەژار مامۆستای جەسوور
شەهید محەمەد ئەمینمان بە چاوێکی تەڕ و سوور
ماملێ لە دەنگ خۆشیدا ئینسانێکی بێ قسوور
گەرچی دوو ساڵ نەخۆش بوو وا دەیناڵان لە نێو ژوو

دەچمە چوارڕای مەولەوی ماملێ دێتەوە بیرم
ئەگەر ماملێم لە بیر چێ لێم حەڵاڵ نەبێ شیرم
دەنگ خۆش بوو بۆ ئاوازێ خودا بە ئێمەی دابوو
لە چوارپارچەی کوردستان ئەو یەکەم و تەنها بوو
لە دووی مریەم سابڵاغی، زێنەبێک لە قەڵاتان
یا فاتمێ گەردن کێل ماملێ گەڕا وڵاتان
بەڵام دەستی نەکەوت هەناسە سەرد مایەوە
بۆ کن هێمن و هەژاری عاقیبەت بایدایەوە

بچینە بوداغ سوڵتان و بێینەوە سەر پردی سوور
ئێواران لێی دەڕوانی نیشان دەدا هەزار جوور
لاو و کیژی سادە و پاک، پاکی بە چەشنی بلوور
سەتی دەڕوا بۆ ئەوبەر سەتیش دەچێتەوە نێو ژوور

قەدیم مەیدانی هەردی مەرکەزێک بوو لە شاری
جێگای حەسانەوەی بێ بۆ ساغ و دەردەداری
کەتوومە یادی ماملێ هونەرمەندی کوردەواری
زۆر مەحاڵە وێنەی بێ لە دێهات یا لە شاری
بەرەو ئەسحابەی سپی تێکی نا کۆچ و باری
بۆتە هاوڕێی سەفەری خاڵە هێمن و هەژاری

دەچمە دۆڵی کەروێشکە و دێمەوە تەپەی قازی
بارگە و بنەم لێ ناوە دەکەم خوداحافزی
دەڕۆم بەجێی دەهێڵم دیسان بە هەوای دیدار
ڕەبی هەروا بمێنێ خۆش و زەنوێر و سازگار
ئەوەی دوژمن بە تۆیە ڕەبی کوێر بێ لە چاوان
نێوت هەروا بەرز بێ مەسکەنی شێرە پیاوان

کۆپی کردن بێ ئاماژەدان بە سەرچاوە قەدەغەیە
More
Song image
هاتەوە تەیرەکەی گەرمێنێ

By - سمایل سەردەشتی Smaîl Serdeştî

هاتەوە دێتەوە تەیرەکەی گەرمێنێ

ئای لە دوور دێ شەقەی باڵی

ئەرێ وەی بۆ هەر لایێک پێی خۆش بێ دەڕوا

ئاخ هەزار خۆزگەم وەی بە حاڵی

هاتەوە دێتەوە تەیرەکەی گەرمێنێ

بەخێرێ

ئای بەو تەیرە دەڵێن ئای هەڵۆیە

ئەرێ من بە قوربانی شاباڵیان مرم چۆن هەڵ دەکەن لە گەرمای کۆیە

هاتەوە دێتەوە تەیرەکەی لای کۆیە

بەخێرێ

ئای دەڵێن بچینەوە بۆ عێرانێ

هاتەوە دێتەوە تەیرەکەی گەرمێنێ

بەخێرێ

ئای دەڵێن بچینەوە بۆ عێرانێ

ئەرێ وەی دەبا بچینە پێشوازیان کوڕینە

ئەرێ وەی دەبا بچینە پێشوازیان وێکڕا

ئەی ئەوەی خۆی بە کورد دەزانێ

ئاخ گەردوون گەڕان کوشتمی

نەزان پەرستی بۆ نان کوشتمی

هەر چەوسانەوەی بێ حەسانەوە

مردن های لە کوێ ژیان کوشتمی

قەت لە پێناوی نان و ئاوێ

سەر دامەنەوێنە بۆ هەر ناپیاوێ

هەر ئەم ژینە هەر دەمێ دێت و دەڕوا

مەردایەتیت مەفرۆشە لە پێناوی تاوێ

ژیان ئاوایە و وا دەڵێن مەردانی ڕۆژگاری

مار هەزار پێچیش بخوات لە ڕاست کونەکەی خۆی دەبێ ڕاست بچێتە خوا

نەتبیستووە دەڵێن

دنیا بۆ کەس تا سەر نامێنێ

لە سەوزاییدا چەقەڵێک ساز بێ دەبێ پشتی شێرێ بشکێنێ

هاتەوە دێتەوە تەیرەکەی گەرمێنێ

بەخێرێ

ئای دەڵێن بچینەوە بۆ کوێستان

هاتەوە دێنەوە تەیرەکەی گەرمێنێ

بەخێرێن

ئای دەڵێن بچینەوە بۆ کوێستان

ئەی وەی دەبا بچینە پێشوازیان کوڕینە

چون بە بێ وان چۆڵە کوردستان

کۆپی کردن بێ ئاماژەدان بە سەرچاوە قەدەغەیە
More
Song image
خەنەبەندانیەتی

By - سمایل سەردەشتی Smaîl Serdeştî

ئاواتی دڵی زاوایە خەنەبەندانیەتی
کچە کوردێکی بێ پایە خەنەبەندانیەتی
ئەو بەو دێیەی بە قیمەت نایە خەنەبەندانیەتی
بە شەرم و حەیا و ئیقایە خەنەبەندانیەتی
زرینگ و زانا و وریایە خەنەبەندانیەتی
ئۆف خەنەبەندان خەنەبەندان خەنەبەندانیەتی
ئەی تماشای قەد و باڵای کە زاوا لە کن شانیەتی
زاوا چاوەڕوانیەتی
ئەی پیرۆز بێ بووکی بێ وێنە خەنەبەندانیەتی
سەری ڕووسووریت هەڵێنە خەنەبەندانیەتی
ئەرێ ماڵە زاوای وەحەسێنە خەنەبەندانیەتی
دڵی زاوای وەڕازێنە خەنەبەندانیەتی
با بڵێن بووکی چاکیان هێنا خەنەبەندانیەتی

چاکی مەردی بەلادا کا خەنەبەندانیەتی
ماڵە زاوای ئاوەدان کە خەنەبەندانیەتی
بە حەیا و ڕووسوور و پاکە خەنەبەندانیەتی
لە سەد سواری شەرمێ ناکا خەنەبەندانیەتی
ئەرێ تا دنیا بڵێ بووکی چاکە خەنەبەندانیەتی
با دنیا بڵێ بووکی چاکە خەنەبەندانیەتی

ئاواتی دڵی زاوایە خەنەبەندانیەتی
کچە کوردێکی بێ پایە خەنەبەندانیەتی
زرینگ و زانا و وریایە خەنەبەندانیەتی
ئۆف خەنەبەندان خەنەبەندان خەنەبەندانیەتی
ئەی تماشای قەد و باڵای کە زاوا لە کن شانیەتی
زاوا چاوەڕوانیەتی

کۆپی کردن بێ ئاماژەدان بە سەرچاوە قەدەغەیە
More
Song image
مامە کوڕنوو

By - سمایل سەردەشتی Smaîl Serdeştî

سەیرە بەزمە هەڵپەڕینە پڕ لە قاقای خەندەیە
نەعرەتەی گوێ کەڕ ئەکا جۆش و کوڵی سەیوانەکەم
نەعرەتەی گوێ کەڕ ئەکا جۆش و کوڵی گریانەکەم
مامە کوڕنووی ڕاکشاوی گردەکەی سەیوانەکەم
سەر ڕەحەت دڵ بێ گرێ گوێ شل کە بۆ داستانەکەم
سەر ڕەحەت دڵ بێ گرێ گوێ شل کە بۆ گریانەکەم

ئەرغەوان سوورە بەهارە گوڵشەنە ڕازاوەیە
دەشت و کۆ گریان و پڕشۆیە وەنەوشەی وانەکەم
دەشت و کۆ ڕەنگین و پڕشۆیە وەنەوشەی یانەکەم
مامە کوڕنووی ڕاکشاوی گردەکەی سەیوانەکەم
سەر ڕەحەت دڵ بێ گرێ گوێ شل کە بۆ داستانەکەم
سەر ڕەحەت دڵ بێ گرێ گوێ شل کە بۆ گریانەکەم

خەرمەنی لالە لە کۆهساران و پێدەشت و نشێو
سوورترە لەو خوێنە باریوەی کوڵی گریانەکەم
مامە کوڕنووی ڕاکشاوی گردەکەی سەیوانەکەم
سەر ڕەحەت دڵ بێ گرێ گوێ شل کە بۆ داستانەکەم

کوڕنوو: ئەحەی کوڕنوو ناوی ئەحمەدی کوڕنووە لە زەمانی کاک ئەحمەدی شێخا نۆکی کوڵانووە لەبەر ئەوەی پیاوێکی خۆش مەشرەب و قسەخۆش بووە و حەرەکاتی سەیر و سەمەرەی کردووە و بۆتە هۆی بەزم و پێکەنین و خۆشی کاک ئەحمەد بردوویەتی بۆ حەج. پیاوێکی عاقڵ و هۆشمەند بووە… گاڵتەی بە ناهەمواری زەمانە هاتووە. خەڵکی شاری سلێمانی بووە و هەر لەوێش کۆچی دوایی کردووە.
گردی سەیوان: بەناوبانگترین گۆڕستانی شاری سلێمانییە کە ژمارەیێکی زۆر لە زانایان و شاعیرانی کورد لەوێدا نێژراون.
سەر ڕەحەت: مێشک هێمنە و بە هیچ کارێکی ناڕەواوە خەریک و ماندوو نییە.
گوێ شل کە: گوێ بگرە.
نەعرەتە: بۆ دەنگ و هاوارێکی بەرز و بەهێز بەکار دێت و وەک ئەڵێن: نەعرەتەی شێر یا نەڕەی شێر.
پڕ شۆیە: تەڕ و تووشە.
یانەکەم: خانەکەم خانووەکەم.

کۆپی کردن بێ ئاماژەدان بە سەرچاوە قەدەغەیە
More