site loader
Song image
دیسانەوە باوکم – شێرکۆ بێکەس

By - شێرکۆ بێکەس Şêrko Bêkes

مردن

ئێجگار بەو شێوەیە ترسناک و خەتەر نییە وەکوو خەڵکی باسی ئەکەن

من بە باوکما ئەزانم

شەس ساڵ لە لای مردنە و دوێنێ کە هاتەوە ماڵێ گۆڕانی وا نەگۆڕابوو کە ئێمە نەیناسینەوە

ڕاستە مردن دەم و چاوی هەندێ شێعری تا ڕادەیەک پیر کردبوو

ڕاستە مردن هەندێ چرچ و لۆچی تازەی خستبووە نێو قسەیەوە

کەمێک ڕەنگی هیواکانی زەرد کردبوو!

بەڵام هەرگیز نەوەریبوون

لەبیر ساڵ نەچووبوونەوە

باوکم دوێنێ وەختێ گەڕایەوە ماڵێ قەڵەم و کاغەز و گوڵ و دڵی منداڵ و باڵندە هەموویان چوون بە پیریەوە

ئاخر ئەگەر وەکوو ئەڵێن مردن ئەوەندە دڕندە و خەتەر بوایە

ئەوی ئەخوارد و نەئەما و لەبیری شێعریش ئەچۆوە

بەڵام ئایا ئەم مردنە بۆ هەموو کەسێ هەر وایە؟

یان بە تەنها بۆ ئەوانەی کە هەرگیز لێی نەترساون و وەکوو باوکم

سەریان داوە بە ئازادیی و دڵیان کردووە بە چرا و چراشیان داوەتە دەستی خۆشەویستی ئەم دنیایە

کۆپی کردن بێ ئاماژەدان بە سەرچاوە قەدەغەیە
More