خۆزگە بەو ڕۆژە کە لەو مەنزڵە وێرانە دەڕۆم
وەکوو مەل لەو قەفەز و دانە بەرەو لانە دەڕۆم

گەرچی لەو ‌ڕێیە دەزانم کە غەریب نابەڵەدە
من بە بۆنی سەری ئەو زولفە پەرێشانە دەڕۆم

وەکوو با بەو لەشی بیمار و دڵی بێ‌تاقەت
بە هەوای قامەتی ئەو سەروی خەرامانە دەڕۆم

دڵ لە زیندانی سکەندەر وەڕەزە، ڕزگار بم
تاکوو ئەو جێیە کەوا مڵکی سولەیمانە دەڕۆم

ئەوی سووکبارە خەمی حاڵی گرانباری نییە
من بەهۆی هیممەتی پیرانە مریدانە دەڕۆم

گەر بەسەر وەک قەڵەمێ، ڕێگە بڕۆم بۆ لای ئەو
بەو برینی دڵ و بەو دیدەیی گریانە دەڕۆم

شەرتە کردوومە ئەگەر لەو خەمە دەرچم ڕۆژێ
بە شێعر خوێندنەوە تا دەری مەیخانە دەڕۆم

بەهەوای چاوی بە ڕەخسین و سەما وەک زەڕڕە
تاکوو سەرچاوەیی ئەو خۆرە درەخشانە دەڕۆم

گەر وەکوو حافزی لەو دەشتە نەشێ ڕێ ‌دەرکەم
لەگەڵ ئەو بار و بنەی ئاسەفی دەورانە دەڕۆم
Xozge bew roje ke lew menzile wêrane derom
Wekû mel lew qefez û dane berew lane derom

Gerçî lew rêye dezanim ke xerîb nabelede
Min be bonî serî ew zulfe perêşane derom

Wekû ba bew leşî bîmar û dilî bêtaqet
Be heway qametî ew serwî xeramane derom

Dil le zîndanî sikender wereze, rizgar bim
Takû ew cêye kewa milkî suleymane derom

Ewî sûkbare xemî halî granbarî nîye
Min behoy hîmmetî pîrane mirîdane derom

Ger beser wek qelemê, rêge birom bo lay ew
Bew birînî dil û bew dîdeyî giryane derom

Şerte kirdûme eger lew xeme derçim rojê
Be şê’ri xwêndinewe ta derî meyxane derom

Beheway çawî be rexsîn û sema wek zerre
Takû serçaweyî ew xore direxşane derom

Ger wekû hafizî lew deşte neşê rê derkem
Legel ew bar û biney asefî dewrane derom