زەوی هێشتا لە ڕووت هەڵدێ بدەی سووڕ؟
نەڕووخای ئاسمانی پیری پشتکووڕ؟
کە سۆمایی لە چاو باوکان بڕاوە
بەرۆکی پیرەدایکان دادڕاوە
وەتەن دێوانەکەی خۆتم
وەتەن من خاکی بەرپێتم
جگەرسووتاوی لاوانی بەبێ ماڵ و بەبێ جێتم
لە ڕێگای عەشقی میللەتدا فەداکاری دەکەم، شێتم

پەرێشانم پەرێشانم دەمێکە
دڵی من هەر دەمەی لانەی خەمێکە
خۆ هێندە دڵپڕم پێم خۆشە بگریم
وەی کە فرمێسک و هەناسەش مەڵحەمێکە
وەتەن های ژین و ژیوار
وەتەن خزم و کەس و کار
وەتەن بۆت دەمرم ئەوجار

وەکوو ئاوی بنی گۆمێ کە جێ مابم لە ڕووبارێ
وەکوو بەردی قەدی شاخی کە تەنرا بم لە دیوارێ
هەر وەک گەڵای زەردی پایز دەسم بەربەن لە قەد دارێ
دڵم تەنگە لە تەنهایی، نە هەمڕازێ، نە خەمخوارێ
من ئەو بەردەی گرفتارم کە دیلی چینی دیوارم
هەر ئەو ئاوەی بنی گۆمم کە جێ ماوم لە ڕووبارم
گەڵای زەردم، مەلی پیرم، منم زامداری زەنجیرم
گەڵای زەردم، مەلی پیرم، منم دڵداری زەنجیرم
وەبیرم دێ کە چەن ساڵە لە بەندیخانە یەخسیرم
لە تاریکی ژیانمدا لە سووچی سەردی زیندانا
بە مۆرەی نەردی ناکامی بەجارێ عومری خۆم دانا
بەڵام ئەو کاتە لاوێ بووم کەچی ئێستا وەها پیرم
هەیە جارێ غەمینیی ئەو دڵەی خۆم بێنەوە بیرم*؟؟؟
قەرەوڵ دێت و ڕادەبرێ شەوانی عومرم ئەژمێرێ
شەوێک دێ وا منی دیلیش بە دەستی مردن ئەسپێرێ
شەوێک دێ وا منی دیلیش بە دەستی مردن ئەسپێرێ

شەوی تاریکە لێم شێواوە ڕێگا
بەیانی هات و زۆری ماوە ڕێگا
ژیانم هەر وەکوو ئەوشۆ وەهایە
بەرەو هەرلا دەچم بەسراوە ڕێگا
وەتەن ئەی مەوتەنی دایە
وەتەن دەینێ لە دڵمایە
سەری بێ نرخ و بێ مایە
لە پێناوی وەتەندایە

*؟؟؟= لەم بەشە دڵنیا نین چونکە گۆرانیبێژ لێرەدا شتێکی جودا لە دەقی شیعرەکەی مامۆستا شەریفی هۆنەری ئەم هۆنراوەیە دەڵێ.
هەروەها سپاسی کاک شاخەوان دەکەین کە فایلی تەواوی ئەم گۆرانییەیان بۆمان ناردووە.

لە ئاسۆیەکی دوورە دەست ئاوابوو زەردەی پایزی
دەتگوت بووکێکی بێ نازە پەردە جێ دێڵێ بە زیزی
پەڵە هەورێکی چڵکنە گرتی سووچێکی ئاسمان
گەڵای زەردی دارێک وەری زریان بردی بەرەو نەمان
شەپۆڵێک مۆسیقای بەسۆز هات و ڕابورد بە بن گوێمدا
شوێنێکی بۆ خۆی کردەوە لە ناخی دڵی توێ توێمدا

هەوا بوولێڵە، ئاو لێڵە گوڵ سیس بووە، گەڵا زەردە
تەنانەت ڕەنگی گۆڕاوە ئەم دیوار و دار و بەردە

تەماشای هەر شوێنێ دەکەم ڕەنگی پایزی گرتووە
جوانی خۆی لێ شاردوومەوە دزێوی ڕیزی گرتووە

ئارام ئارام بەلۆژە لۆژ ئەوا بەرەو ماڵ بوومەوە
نە کەس لە پێشمدا دەڕوا نە کەس دیارە بەدوومەوە

نا نا ناڕۆم، مەلەی دەکەم لەنێو دەریای مەندی خەیاڵ
داهێزاو و ڕووگرژ، تووڕە دڵ پڕ تاسە، مێشک بەتاڵ
ئاخ، دیسان ڕووپەڕێک دڕا لە ڕۆژ ئەژمێری تەمەنم
ئاخ، دیسان شەو داهاتەوە من هەروا دوورە وەتەنم

ئاخ، دیسان چوومە ژێر باڵی ڕەشی شەوگاری تەنیایی
ئاخ، دەبێ ئەوجار بچێژم ژەهراوی تاڵی جودایی

خۆ دەبێ ڕابوێرم لە دیوێکی سارد و سڕدا
دەگەڵ ئازار دەستەملان بم تا بەیان لە نوێنی شڕدا

دەڕۆم، دەترسم، دەلەرزم لە پەلاماری مۆتەی شەو
داد لە دەس ئەو دڵەی بە خەم وای لە چنگ ئەو چاوەی بێ خەو

دوور قاقایەکم گوێ لێ بوو دەتگوت گوللەم پێوە دەنێ
چۆن بە ئێوارەی پایزیش ئی وا هەیە پێ دەکەنێ

خەیاڵم ببوو بە وشە نەمزانی کەس بەدوامەوە
دەنگێکی لەرزۆک و نەرم بەسپایی جوابی دامەوە:
وتی هەن و یەکجار زۆرن بازرگانی فرمێسک و خوێن
بەڵێ هەن و پێ دەکەنن بە سەر بە هەش، بە مل بە کوێن
بەڵێ هەن و پێ دەکەنن بە من، بە تۆ، بە هەزاران
بە داخی باوک کوژراوان بە هەنیسکی هەتیوباران