جوانپەرستم جوانپەرستم
بە دیداری جوانان مەستم
کە دەبینم کیژی تەڕپۆش
گشت غەمێ دەکەم فەرامۆش
کە کیژێکی جوان دەبینم
ساڕێژ دەبنەوە برینم
هەی لێ لێیە وەی لۆ لۆیە
لە کوردستان خۆشتر کوێیە

کە نازدارێ دێ ڕادەبڕێ
دڵی ساردبووم گڕ دەگرێ
کە چاو لە چاوانی دەبڕم
بە ئاسمانێدا هەڵدەفڕم
کە ڕێک دەگوشم پەنجەی نەرم
لەشی ساردم دەبێ گەرم
هەی لێ لێیە وەی لۆ لۆیە
ئاخ لێ لێیە وەی لۆ لۆیە
لە کوردستان خۆشتر کوێیە

یاری نابینم لە کەسدا هۆزی یاران چوونە کوێ
دابی دۆستی کەی تەواوبوو یاری جاران چوونە کوێ
ئەو وڵاتە شاری یار و میهرەبانان بوو سەرێک
میهرەبانی کەی تەواوبوو یاری شاران چوونە کوێ

بزەی شیرینی سەر لێوێ
هەستی پیرانەم دەبزێوێ
نازی شۆخێکی نازەنین
دەمباتە بەهەشتی بەرین
هەی ئاواتی پیرۆزی من
خۆشی دڵی بەسۆزی من
هەی لێ لێیە وەی لۆ لۆیە
لە کوردستان خۆشتر کوێیە

بای بەیان، بای بەیان ئەی هاوار بەیانم لێڵە

ئەرێ توخودا ئازیزم وەی مەڕۆ بەجێم مەهێڵە

کچێ توخودا نەرمێ گیان وەی مەڕۆ بە جێم مەهێڵە

وەرە با بچینە بێستوون نەرمێ گیان ببینین فەرهاد

کچێ با بزانین چی کرد دیدە گیان ئاشقی ڕەنج بە باد

کچێ با بزانین چی کرد دیدەکەم ئاشقی ڕەنج بە باد

وەرە دەترسم بمرم باوانم لەو دوور وڵاتە

ئەرێ دڵ پڕ لە خۆزگە و نەرمێ گیان ئۆف و ئاواتە

وەرە دڵ پڕ لە خۆزگە و باوانم ئۆف و ئاواتە

بای بەیان، بای بەیان وەی بای بەیانم خۆشە

وەرە دەستم لە مل کە وەی هەتا دونیا خامۆشە

وەرە کاڵی بۆ خاتر باوانم ئەبداڵانی کۆ

وەرە هەرگیز نەیبینم دیدەکەم داخی دیدەی تۆ

وەرە هەرگیز نەیبینم باوانم داخی دیدەی تۆ

بای بەیان، بای بەیان وەی بای بەیانم خۆشە

وەرە دەستم لە مل کە وەی هەتا دونیا خامۆشە

زۆر سپاس بۆ خاتوو لەیلا

بێتەوە بێتەوە تەیرەکەی گەرمێنێ
وەی هێشتا دوورە و دەخوێنێ
ئەرێ من سەرم بە فیدای ئەو تەیرە بێ گوڵم
ئای کە نیشانەی بەهار دێنێ
ئەرێ من سەرم بە فیدای ئەو تەیرە بێ گوڵم
ئای کە نیشانەی بەهار دێنێ
بێتەوە بێتەوە تەیرەکەی قەندیلێ
وەی بەو تەیرەم دەڵێن هەڵۆیە
ئەرێ من لەبەر شاباڵی دەمرم گوڵم
سەربەرز و سەربەخۆیە
ئەرێ دوور دەڕوانێ بۆ ژیان، حەیات
ئای لە بەرزی نیشتەجێیە
بێتەوە بێتەوە تەیرەکەی گەرمێنێ
وەی بە فڕینی خاسەکەوە
ئەرێ دیارن لە دوور دەخوێنن، گوڵم
سەرسەوزی چیام پێ بڕاوە
ئەرێ قاسپەی کەو لە کوێستان دێ، حەیات
لە ئاسمان و عەرزەوە

خەنەبەندان خەنەبەندان خەنەبەندانیەتی ئەمشەو
هەوری لە ملان هەوری لە ملان شەدە لە ملانیەتی ئەمشەو

چەندە جوانە نەشمیلانە دڵم حەیرانیەتی
خەندە لێوە دڵ بزێوە مەیلی جێژوانیەتی ئەمشەو
خەنەبەندان خەنەبەندان خەنەبەندانیەتی ئەمشەو
هەوری لە ملان هەوری لە ملان شەدە لە ملانیەتی ئەمشەو

پەلکی *؟؟؟ عیشقی خاوێن کیژی دەورانمە
دڵڕفێنە خەمڕەوێنە خۆری هەورانمە ئەمشەو
خەنەبەندان خەنەبەندان خەنەبەندانیەتی ئەمشەو
هەوری لە ملان هەوری لە ملان شەدە لە ملانیەتی ئەمشەو

چاوشەهێنە و خۆنوێنە بوتی بوتخانەیە
چاوکەژاڵە و لێوی ئاڵە ساقی مەیخانەیە ئەمشەو
خەنەبەندان خەنەبەندان خەنەبەندانیەتی ئەمشەو
هەوری لە ملان هەوری لە ملان شەدە لە ملانیەتی ئەمشەو

شەمی بەزمە، شیعر و نەزمە عیشقی پەروانەیە
هێزی هەستە دڵی مەستە یاری جانانەیە ئەمشەو
خەنەبەندان خەنەبەندان خەنەبەندانیەتی ئەمشەو
هەوری لە ملان هەوری لە ملان شەدە لە ملانیەتی ئەمشەو

*؟؟؟= ئەو وشەیەمان بۆ ڕوون نەبۆتەوە، تکایە ئەگەر لێی تێدەگەن و دەزانن چ دەڵێ بۆمانی بنووسن
سپاس