کاروان کاروان
کێ نوستووە کێ بێدارە
ئەم ڕێگایە پێدا دەچن
هەر ڕێگا کۆنەکەی پارە
دەوروبەرتان گورگە لوورە
چەقەڵ کاسەی سەر و گۆشتی دڵتان ئەخوا
ئەوەندە تاریکی چڕە
جندۆکە کۆرپەتان دەدزێ
پێ نازانن

چاوتان لە ناو تاریکیدا
تا ئەم خوارە هەتەر ناکات
بیرتان ئاسمانێکی تەسکە
هێندە بەرچاوتان تاریکە
نازانن ڕۆژ لە ئاسۆی کام پێدەشتەوە سەر هەڵدێنێ

هەر بە تەشیە کۆنەکەتان دەیڕێسن و
لە بیری نوێ سڵ و سرکن
هەر ئەڕۆن و هەر بە ناخی قووڵی زوڵمەتا ڕۆ دەچن
چراکانیش کز ئەسووتێن
هێندێ چرایش چاوی گورگن

کاروان کاروان
هۆ کاروانی سەر لێشێواو
لە شەوگاری ئەنگوستە چاو
گۆچانی شک دەلاقەیەک ناکاتەوە
مەشغەڵ مەشغەڵ
مەشغەڵی بیر
چرای ئەندێشەتان هەڵکە‌ن
ڕێگا و ڕەوتێ هەنگاوەکانتان بگۆڕن

ئەم ڕێگایەی پێیدا دەڕۆن
زۆر کاروانی پێدا ڕۆی و نەهاتەوە

کاروان کاروان
بۆ کوێ دەڕۆن
ئەم هەورازەی وەک مێروولە
پێدا ڕێکچەتان بەستووە
دەتانباتە هەڵدێرەکەی ساڵی پێشوو
ئەو بنارەش
وا بە ئێسک و کاسەی سەرتان داپۆشراوە
دەگاتەوە بەفرەچاڵی کلیلەی ڕندوو

کاروان کاروان
ڕێگای تازە بدۆزنەوە
کاروان کاروان
ڕێگای تازە بدۆزنەوە

Karwan karwan
Kê nustuwe kê bêdare
Em rêgaye pêda deçin
Her rêga konekey pare
Dewrubertan gurge lûre
Çeqel kasey ser û goştî diltan exwa
Ewende tarîkî çire
Cindoke korpetan dedzê
Pê nazanin

Çawtan le naw tarîkîda
Ta em xware heter nakat
Bîrtan asmanêkî teske
Hênde berçawtan tarîke
Nazanin roj le asoy kam pêdeştewe ser heldênê

Her be teşye koneketan deyrêsin û
Le bîrî nwê sil û sirkin
Her eron û her be naxî qûlî zulmeta ro deçin
Çirakanîş kiz esûtên
Hêndê çirayş çawî gurgin

Karwan karwan
Ho karwanî ser lêşêwaw
Le şewgarî enguste çaw
Goçanî şik delaqeyek nakatewe
Meşxel meşxel
Meşxelî bîr
Çiray endêşetan helken
Rêga û rewtê hengawekantan bigorin

Em rêgayey pêyda deron
Zor karwanî pêda roy û nehatewe

Karwan karwan
Bo kwê deron
Em hewrazey wek mêrûle
Pêda rêkçetan bestuwe
Detanbate heldêrekey salî pêşû
Ew binareş
Wa be êsk û kasey sertan dapoşrawe
Degatewe befreçalî kilîley rindû

Karwan karwan
Rêgay taze bidoznewe
Karwan karwan
Rêgay taze bidoznewe