بەهار و کوردەواری خەمڕەوێنه
کەژ و لاپاڵ و نواڵەی دڵڕفێنه
به سروە گوڵ هەموو خەمڵیوە ئەمڕۆ
بەهاری من ئەتۆی چاوان هەڵێنه

بەهاری ئێمه دێ و خونچه دەخەمڵێ
بەرەو دەشت و چیا گشتی دەڕەنگێ
لەگەڵ یاری به تاسەی دووره زێدم
دەچینە سەیری نواڵه و مێرگ و پژوێ

ئەوە نەورۆزه خەملیوە کەژ و کۆ
ئەتۆ پێت وایه من چۆنم بەبێ تۆ
خەمینم لێو بەبارم دڵ شکاوم
له ناخی جەرگ و دڵ هەڵدەستێ بۆسۆم

وەکوو کوێستانی تەم گرتووی وڵاتم
به شەوگاری خەمان داماو و ماتم
بەڵام نووری هومێدم هەر له دڵدا
هەتا هەم چاوەڕوانی ڕۆژهەڵاتم

Behar û Kurdewarî xem rewêne
Kej û lapal û nwaley dilrifêne
Be sirwe gul hemû xemlîwe emro
Beharî min etoy çawan helêne

Beharî ême dê û xunçe dexemlê
Berew deşt û çiya giştî derengê
Legel yarî be tasey dûre zêdim
Deçîne seyrî nwale û mêrg û pijwê

Ewe newroze xemlîwe kej û ko
Eto pêt waye min çonim bebê to
Xemînim lêw bebarim dilşikawim
Le naxî cerg û dil heldestê bosom

Wekû kwêstanî tem girtûy wilatim
Be şewgarî xeman damaw û matim
Belam nûrî humêdim her le dilda
Heta hem çawerwanî rojhelatim