بولبولی باڵشکاوی وە‌ختی گوڵم
هەر شە‌پۆلان دە‌دا دڵی لە‌ کوڵم
کوردی بە‌ندیی بە‌یانی نە‌ورۆزم
گڕی گرتووە‌ دەروونی پڕ سۆزم
موغی بێ‌ ئاگری شە‌وی یە‌ڵدام
چاوە‌ڕێی چارە‌نووسی ناپە‌یدام
کە‌وی بێدە‌نگی نە‌وبەهارانم
گوڵی بێڕە‌نگی چاو لە‌ بارانم
کونجی جێژوانی چۆڵ و خامۆشم
سێبەری نازە‌نینی ڕە‌شپۆشم
دە‌ستی بەربووی کچی گە‌ڕی شاییم
هەستی خنکاوی لاوی سە‌وداییم
کێلی گۆڕی شەهیدی گومناوم
تاکە‌داری کڕووزی بێ‌ ئاوم

دە‌فتەری شیعری شاعیری ڕووتم
شە‌می سەرگۆڕ و داری تابووتم
کونی گیراوی کۆنە‌ شمشاڵم
خە‌ونی ئاڵۆز و خاتیرە‌ی تاڵم
ژیلە‌مۆی ئاگری بە‌یانانم
باوکی فرمێسکم و کوڕی ژانم
باڵە‌ سووتاوە‌کانی پەروانە‌م
شووشە‌ بادە‌ی بە‌تاڵی مە‌یخانە‌م
چڵە‌ ڕێحانی دوورە ‌دێراوم
سازی ناسازی هە‌ڵپە‌سێراوم
تکە ‌ئاونگی سەر گە‌ڵای زەردم
خە‌ستە‌ و دەردە‌داری چی دەردم

ئاخرین تیشکی خۆری پاییزم

شاعیری پیری توڕە و زیزم
چۆن دە‌توانم بە‌ تۆ بڵێم من چیم
خۆم گومانم هە‌یە‌ کە‌ هە‌م یا نیم

Bulbulî balşikawî wextî gulim

Her şepolan deda dilî le kulim

Kurdî bendîy beyanî newrozim

Girî girtuwe derûnî pir sozim

Muxî bê agirî şewî yeldam

Çawerêy çarenûsî napeydam

Kewî bêdengî newbeharanim

Gulî bêrengî çaw le baranim

Kuncî cêjwanî çol û xamoşim

Sêberî nazenînî reşpoşim

Destî berbûy kiçî gerî şayîm

Hestî xinkawî lawî sewdayîm

Kêlî gorî şehîdî gumnawim

Takedarî kirûzî bê awim

Defterî şî’rî şaîrî rûtim

Şemî sergor û darî tabûtim

Kunî gîrawî kone şimşalim

Xewnî aloz û xatîrey talim

Jîlemoy agirî beyananim

Bawkî firmêskim û kurî janim

Bale sûtawekanî perwanem

Şûşe badey betalî meyxanem

Çile rêhanî dûre dêrawim

Sazî nasazî helpesêrawim

Tike awnigî ser gelay zerdim

Xeste û derdedarî çî derdim

Axirîn tîşkî xorî payîzim

Şaîrî pîrî ture û zîzim

Çon detwanim be to bilêm min çîm

Xom gumanim heye ke hem ya nîm

بەهار بوو فەسڵی زستانم ئەگەر یارم لەگەڵ بایە
درۆیە گەر گوتوویانە بە خونچێکی بەهار نایە
لە بارانێ مەپرسە تا هەور بگرێ بەری ڕۆژێ
دەبێ بگریم هەتا ڕووی تۆ لە ژێر چارشێوی ڕەشدایە
هەناسەم لادەدا ڕووبەند و چارشێوی ڕەشت ئاخر
هەور هەرچەندە پڕ بێ کوا حەریفی قودرەتی بایە؟
لە ژێر سایەی برۆکەتدا حوکمڕانی دەکا چاوت
لە سایەی دووخی شمشێرە کە حاکم حوکمی ئیجرایە
لەسەر بەفرێ بەکار نایە وەکو بیستوومە داوی ڕەش
لەسەر کوڵمەت ئەدی بۆ دڵگرە ئەو بسکە تاتایە؟
هونەر ناتوانێ جوانی تۆ بە هیچ شێوێکی بنوێنێ
لە مەڕمەڕ چۆن دەتاشرێ هەیکەلی ئەم بەژن و باڵایە؟
بە ڕیشی بۆزەوە سوجدەی دەبەم من بۆ جەماڵی تۆ
ئەدی بۆچی دەیانگوت دار کە پیر بوو تازە دانایە؟
بزەت نایەتە سەر لێو و بەزەییت نایە بە حاڵمدا
ئەگەرچی زۆر لە ‌مێژساڵە لە دووت دەخشێم وەکوو سایە
دەزانی بۆچی من هێندە پەرێشان و خەفەتبارم
لە بازاڕی ژیان غەیری هونەر نیمە چ سەرمایە
بەتوو تووش تووشی مەکتەب بۆ دەهاتم من کە زانیبام
خەفەت، مەینەت، کەسەر، حەسرەت، بەشی ئینسانی زانایە
لەگەڵ چارەڕەشی و دوورەبەشی و نەگبەت دەبێ هەڵکەم
لەمێژە چارنووسی شاعیرانی کوردی هەر وایە

Behar bû feslî zistanim eger yarim legel baye
Diroye ger gutûyane be xunçêkî behar naye
Le baranê mepirse ta hewir bigrê berî rojê
Debê bigrîm heta rûy to le jêr çarşêwî reşdaye
Henasem ladeda rûbend û çarşêwî reşit axir
Hewir herçende pir bê kwa herîfî qudretî baye?
Le jêr sayey biroketda hukmiranî deka çawit
Le sayey dûxî şimşêre ke hakim hukmî îcraye
Leser befrê bekar naye weku bîstûme dawî reş
Leser kulmet edî bo dilgire ew biske tataye?
Huner natwanê ciwanî to be hîç şêwêkî binwênê
Le mermer çon detaşrê heykelî em bejn û balaye?
Be rîşî bozewe sucdey debem min bo cemalî to
Edî boçî deyangut dar ke pîr bû taze danaye?
Bizet nayete ser lêw û bezeyît naye be halimda
Egerçî zor le mêjsale le dût dexşêm wekû saye
Dezanî boçî min hênde perêşan û xefetbarim
Le bazarî jiyan xeyrî huner nîme çi sermaye
Betû tûş tûşî mekteb bo dehatim min ke zanîbam
Xefet, meynet, keser, hesret, beşî însanî zanaye
Legel çarereşî û dûrebeşî û negbet debê helkem
Lemêje çarnûsî şaîranî kurdî her waye