Ey bilbilê dilşadî hela, wer bike fîxan
Derdê me girane ey bira, birîna me kûr e

Gorî te bitin cerg û dil û mêlak û hem can
Dengê te ye xweştir, ji ney û nay û bilûrê

Sê hawe te deng, yek ji sira bayê siba ye
Hawayê dî ji dengê xuşîna dehl û reza ye

Hawê sisîya ji bihna şemamok û gula ye
Lewra ku li dinyê tu bi nav û tu meşûr e

Karwanê me va bi rê ketî, lê şevreş û tarî
Serma ye terez kulyên di berfê her dibarî

Bahoz e çelapek têne me, ji her çar kenarî
Warê me welat e ey heval, rêça me dûr e

çar hawîr me diz û keleş in, têk dane dijmin
Me ji hev radiqetînin bir bi bir, heyf û mixa bin

Qet çarew umîda me nema ye bilbilê min
Meydan e ji bo hirç û çeqel, gur zûre zûr e

Meydane ji bo hirç û çeqel, rovî û keftar
Gorî te bim bilbil, ji serê darê tu wer xwar

Da pêk ve mijûl bim, bi xwe çend rojên di dijwar
îro li me ferman e, li ser gerdenê şûr e

Destê tewqyê îro ku em herdu bidin hev
çend sal û zemanên di xerab jîn em di gel hev

Dinya bi xwe dewran e, bizan geh roj e, geh şev
Geh tarî û dûman e û geh rewşen û nûr e

Dîna xwe bide nik bayê barîn ey birader
Sitêra sibê îro ji şerqê li me da der

Rewşen kirî Kurdistan,bi carek wê seraser
Nîşana sibê ye, fereca xêrê ne dûr e

Piştê wê sitêrê bi xwe berbanga sibê ye
Wê roj hilê rohnî têkeve şûna şevê ye

Karwanê me wê bighêje war û meqsedê ye
çerxa felekê herdem bi fetl û ger û dewr e

çexa felekê herdem bi fetl û ger û dewran
Hêvî û hawara me di Yezdanê dilovan

Umîd me herdem bi xwe serdarê li Berzan
Wek Tîrêj dibêje: jîn divê kotek û zor e

ئەی بلبلێ دلشادی ھەلا، وەر بکە فیخان
دەردێ مە گرانە ئەی برا، برینا مە کوورە

گۆری تە بتن جەرگ و دل و مێلاک و ھەم جان
دەنگێ تەیە خوەشتر، ژ نەی و نای و بلوورێ

سێ ھاوە تە دەنگ، یەک ژ سرا بایێ سبایە
ھاوایێ دی ژ دەنگێ خوشینا دەھل و رەزایە

ھاوێ سسییا ژ بھنا شەمامۆک و گولایە
لەورا کو ل دنیێ تو ب ناڤ و تو مەشوورە

کاروانێ مە ڤا ب رێ کەتی، لێ شەڤرەش و تاری
سەرمایە تەرەز کولیێن د بەرفێ ھەر دباری

باھۆزە چەلاپەک تێنە مە، ژ ھەر چار کەناری
وارێ مە وەلاتە ئەی ھەڤال، رێچا مە دوورە

چار ھاویر مە دز و کەلەشن، تێک دانە دژمن
مە ژ ھەڤ رادقەتینن بر ب بر، ھەیف و مخا بن

قەت چارەو ئومیدا مە نەمایە بلبلێ من
مەیدانە ژ بۆ ھرچ و چەقەل، گور زوورە زوورە

مەیدانە ژ بۆ ھرچ و چەقەل، رۆڤی و کەفتار
گۆری تە بم بلبل، ژ سەرێ دارێ تو وەر خوار

دا پێک ڤە مژوول بم، ب خوە چەند رۆژێن د دژوار
ئیرۆ ل مە فەرمانە، ل سەر گەردەنێ شوورە

دەستێ تەوقیێ ئیرۆ کو ئەم ھەردو بدن ھەڤ
چەند سال و زەمانێن د خەراب ژین ئەم د گەل ھەڤ

دنیا ب خوە دەورانە، بزان گەھ رۆژە، گەھ شەڤ
گەھ تاری و دوومانە و گەھ رەوشەن و نوورە

دینا خوە بدە نک بایێ بارین ئەی برادەر
ستێرا سبێ ئیرۆ ژ شەرقێ ل مە دا دەر

رەوشەن کری کوردستان،ب جارەک وێ سەراسەر
نیشانا سبێیە، فەرەجا خێرێ نە دوورە

پشتێ وێ ستێرێ ب خوە بەربانگا سبێیە
وێ رۆژ ھلێ رۆھنی تێکەڤە شوونا شەڤێیە

کاروانێ مە وێ بغێژە وار و مەقسەدێیە
چەرخا فەلەکێ ھەردەم ب فەتل و گەر و دەورە

چەخا فەلەکێ ھەردەم ب فەتل و گەر و دەوران
ھێڤی و ھاوارا مە د یەزدانێ دلۆڤان

ئومید مە ھەردەم ب خوە سەردارێ ل بەرزان
وەک تیرێژ دبێژە: ژین دڤێ کۆتەک و زۆرە