چە وە سەرد هاتییە شەرەگەم ئەی کرماشان
پڕ لە خۊنە دڵێ تۆ لە جەفاکاری زەمان
کوڕەیلد دەسە وە دەسە خەفتنە لە پایێ دیوار
نیشتنە دەس و زرانی غەمزەدە لە سایێ دیوار
ئی غەمە بۊشم وە کی؟ من دەس وە دامان کی بووم؟
لەی هەمە دەرد و پەژارە ساتی مێهمانێ کی بووم
چە وە سەرد هاتییە شەرەگەم ئەی کرماشان
پڕ لە خۊنە دڵێ تۆ لە جەفاکاری زەمان

هەر گوشەی کۊچە و خیاوان چەن چەپەی گوڵ پەڕپەڕە
چەن مناڵێ بی خەتا و ئازار لەی جەفا دەروەدەرە
پەهڵەوانی دی غەریبە ئاشنا دۊد و دەواس
بەرقێ شادی وە دڵەیلمان ڕوزگاریگە جیاس
چە وە سەرد هاتییە شەرەگەم ئەی کرماشان
پڕ لە خۊنە دڵێ تۆ لە جەفاکاری زەمان

ئەی دیارێ عاشقی دی ڕەنگ و ڕۆخسارد نییە
تاق وە ساق قەهرە وەگەردد بستۊن یارد نییە
سەرزەمینێ مێهر و مانگ بۊشم وە کی داخێ دڵد
کە عەزاداری وە دەرد و کەس عەزادارد نییە
چە وە سەرد هاتییە شەرەگەم ئەی کرماشان
پڕ لە خۊنە دڵێ تۆ لە جەفاکاری زەمان