چاوەکەم دوور بێ لە ڕووت وا چاوەکانم ژان ئەکەن
ھەر لە سورمەی خاکی ڕێگات ئارەزووی دەرمان ئەکەن

یەعنی ئاوی دیدەکانی من لە دووریی قامەتت
وا بە خوڕ دێن ھەر لە نەھری تانجەڕۆ و سیروان ئەکەن

پەرچەم و لێو و دەمی شیرینی یاری نازەنین
ھەر لە زوڵمات و لە ئاوی چەشمەیی حەیوان ئەکەن

جانفیدای ئەو دولبەرانەم وا بە خەندەی لێویان
بێ موداوا زامی قەلبی عاشقان دەرمان ئەکەن

ئەو کەسانەی خادیمی دەرگای نیگارن دایما
گاڵتە و سوحبەت بە تەختی قەیسەر و خاقان ئەکەن

لادە شاعیر تۆ لە باسی عیشقبازی و سەیری کە
چۆن خەریکن چەن کەسێ ئێستا وەتەن وێران ئەکەن

جاھیلان بۆ ئیستیفادەی زاتی خۆیان ڕۆژ و شەو
لەم موحیتە مەنعی عیلم و سەنعەت و عیرفان ئەکەن

ڕووڕەشی دنیا و قیامەت ئەو نەفامانەن کە وا
ھەجوی قەوم و میللەتی خۆیان بە پارە و نان ئەکەن

ئاسمان ئێستا وەھا چەرخاوە جاھیل غاڵبە
گوربە و ڕێوی خەیاڵی مەرتەبەی شێران ئەکەن

چەن کەسێکی تازە پیاکەوتوو لە کوورە دەرچوون
پیاو کە چوو بۆ ئیش لە پێشا یۆقڵەمەی گیرفان ئەکەن

خەڵقە بەعزێ کەس لە ئینسانی چییان دیوە زەرەر
وا ھەمیشە مەشقی وەحشی و پەیڕەوی حەیوان ئەکەن

Çawekem dûr bê le rût wa çawekanim jan eken
Her le surmey xakî rêgat arezûy derman eken

Yenî awî dîdekanî min le dûrîy qametit
Wa be xur dên her le nehrî tancero û sîrwan eken

Perçem û lêw û demî şîrînî yarî nazenîn
Her le zulmat û le awî çeşmeyî heywan eken

Canfîday ew dulberanem wa be xendey lêwyan
Bê mudawa zamî qelbî aşqan derman eken

Ew kesaney xadîmî dergay nîgarin dayima
Galte û suhbet be textî qeyser û xaqan eken

Lade şaîr to le basî îşqbazî û seyrî ke
Çon xerîkin çen kesê êsta weten wêran eken

Cahîlan bo îstîfadey zatî xoyan roj û şew
Lem muhîte menî îlim û senet û îrfan eken

Rûreşî dinya û qiyamet ew nefamanen ke wa
Hecuy qewim û mîletî xoyan be pare û nan eken

Asman êsta weha çerxawe cahîl xalibe
Gurbe û rêwî xeyalî mertebey şêran eken

Çen kesêkî taze piyakewtû le kûre derçûn
Piyaw ke çû bo îş le pêşa yoqlemey gîrfan eken

Xelqe bezê kes le însanî çîyan dîwe zerer
Wa hemîşe meşqî wehşî û peyrewî heywan eken