چاوی پڕ خوێنم دەگێڕم قیبلەکەم پەیدا نییە
نووری چاوم ڕۆییوە یا دیدەکەم بینا نییە؟
وەک نەیستان ئاورێ بەربۆتە دەروونم بەندبەند
دڵ کە هەروەک نەی دەناڵێ دەم بە دەم بێجا نییە
ئەی چرا لەحزێک مودارا تێر ببینێ ڕەنگ و ڕووت
وەرنە پەروانەی غەریب جان و دڵی پەروا نییە
بۆ نیساری مەقدەمت عومرێکە دەگریم ڕۆژ و شەو
تا بەکەی گەوهەرفشانی، چاوەکەم دەریا نییە؟
چی دەکەم، دەگریم، دەسووتێم، ئاوری دڵ نامرێتەوە
چ بکەم ئاخر نووری دیدەم، سینەکەم سینا نییە
گەر هەزار جار بێ بە کۆی زووخاڵ بە نووری کێوی توور
ئەو دڵە، جۆیایی یەک دیداری وەک مووسا نییە
هات و ڕووی وا کرد و دونیای کردە ناڵەی عاشقان
دا نەڵێن نایێ قیامەت، ڕۆژی واوەیلا نییە
حەڵقە حەڵقە تاری زولفت خستە سەر ڕووی نازەنین
دا نەڵێن ڕۆژ حەڵقەگۆشی ماهی شەوئارا نییە
پێکەنی مەمنوونی کردم، زولفەکەی دامێ بە دڵ
دا نەڵێن شەککەرفرۆشی ئێمە خۆشسەودا نییە
خۆم بەسەر گێڕا کوتم: قوربان پەرێشانی بەسە!
سوێندی خوارد بەو زولفە وەسڵم عەینی سەرگەردانییە
مەنعی ناڵینم لە شەوقی گەردەن و ڕووی خۆت مەکە
بولبولی سوبحی بەهار بێشین و واوەیلا نییە
دڵ کە بەستەی زولفە لەو لێوانە مەحڕوومی مەکە
بێشەکەر ئەم تووتییە ناژی کە هێندوستانییە
گا بە ناز، گاهێ بە غەمزە مەمدە بەر تیغی برۆت
کوشتنی عاشق بە هیچ دینێکی قوربان چا نییە
با فریبی من نەدا واعیز بە گوڵزاری ئیرەم
عاشقی ڕووی تۆ بە هەویای جنة المأوی نییە
گەر هەموو عالەم بڵێن: مەجنوونە، تا دەمرم دەڵێم:
هەردوو دونیا قیمەتی دیداری یەک لەیلا نییە
داد لە دەست حوسنت کە زولفت نابێ بێ ناڵەی دڵان
ئارێ ئارێ دائیرەی شاهانە بێغەوغا نییە؟
چت لە وەسڵی زولفی من؟ فەرموو وەفایی ها دەمم
تالیبی عەیشی ئەبەد بە، عومری دونیا فانییە
سەد هەزار دڵ پێکەنی وەک گوڵ بەدەم بادی بەهەشت
یا هەناسەی جانفەزای گوڵزاری غەوسی سانییە؟
جانشینی حەزرەتی غوث الخلایق قوتبی حەق
فەرعی تاها ئەسڵی یاسین نەوبەری گەیلانییە
ڕەوشەنی چاو و قولووبی عاریفە عەکسی دڵی
کێوی توورە، مەزهەری نوورە، کلی سوبحانییە
پێی لەسەر شانی هەموو وەلیانە جەددی خۆی دەڵێ
جێی لەسەر چاوانە شاهـ و شانشینی سانییە
Çawî pir xwênim degêrim qîblekem peyda nîye
Nûrî çawim royîwe ya dîdekem bîna nîye?
Wek neyistan awirê berbote derûnim bendbend
Dil ke herwek ney denalê dem be dem bêca nîye
Ey çira lehzêk mudara têr bibînê reng û rût
Werne perwaney xerîb can û dilî perwa nîye
Bo nîsarî meqdemit umrêke degrîm roj û şew
Ta bekey gewherfişanî, çawekem derya nîye?
Çî dekem, degrîm, desûtêm, awirî dil namrêtewe
Çi bikem axir nûrî dîdem, sînekem sîna nîye
Ger hezar car bê be koy zûxal be nûrî kêwî tûr
Ew dile, coyayî yek dîdarî wek Mûsa nîye
Hat û rûy wa kird û dunyay kirde naley aşqan
Da nelên nayê qiyamet, rojî waweyla nîye
Helqe helqe tarî zulfit xiste ser rûy nazenîn
Da nelên roj helqegoşî mahî şewara nîye
Pêkenî memnûnî kirdim, zulfekey damê be dil
Da nelên şekerifroşî ême xoşsewda nîye
Xom beser gêra kutim: qurban perêşanî bese!
Swêndî xward bew zulfe weslim eynî sergerdanîye
Menî nalînim le şewqî gerden û rûy xot meke
Bulbulî subhî behar bêşîn û waweyla nîye
Dil ke bestey zulfe lew lêwane mehrûmî meke
Bêşeker em tûtîye najî ke hêndustanîye
Ga be naz, gahê be xemze memde ber tîxî birot
Kuştinî aşiq be hîç dînêkî qurban ça nîye
Ba firîbî min neda waîz be gulzarî îrem
aşqî rûy to be hewyay cinet almiruy nîye
Ger hemû alem bilên: Mecnûne, ta demrim delêm:
Herdû dunya qîmetî dîdarî yek Leyla nîye
Dad le dest husnit ke zulfit nabê bê naley dlan
Arê arê daîrey şahane bêxewxa nîye
Çit le weslî zulfî min? Fermû Wefayî ha demim
Talîbî eyşî ebed be, umrî dunya fanîye
Sed hezar dil pêkenî wek gul bedem badî beheşt
Ya henasey canfezay gulzarî xewsî sanîye?
Canşînî hezretî xup alixlayq qutbî heq
Ferî taha eslî yasîn newberî geylanîye
Rewşenî çaw û qulûbî arîfe eksî dlî
Kêwî tûre, mezherî nûre, klî subhanîye
Pêy leser şanî hemû welyane ceddî xoy delê
Cêy leser çawane şah û şanşînî sanîye