جوانی کوچ کرد لە عومر و گیانم
پیری هات نیشتە پوس و سۆقانم
هەناسەم سەنگین، پەل و پووم ڕزیا
کەس ئەڕام نەمەن خۆدا لەی دۆنیای گەورا
ڕووح و گیانم هەردگ پەریشان
چەوەیلم کەم سوو خۆدا دەس و پام لەرزان

دی کەسێگ نییە بگری خەوەرم
تەنیایی بیەسە بمرم سەرکیشی کەرم
شەوەکی تا شەو چەوم ها وە دەر
بەڵکەم کەسی بای بمرم بکەیدەمە سەر
بەشکەم یەکێگ بای بوودە هاودەمم
کەمی کەم بکەی لە دەرد و خەمم

هەی داد کەس نییە دەر وە ڕۊم وا کەی
خەم و تەنیایی وەی وەی وە لیم جیا کەی
هاوار و بیداد وەی بی کەسیمە
چمانی لە یاد گشت دنیا چیمە
چۊ دارێ وشکیگ تیەنی وارانم
پڕ لە دڵتەنگی دەم ئێوارانم

ڕەنجێ بێوەر و هەناسەی سەردم
دی مانگ و خوەریش قەهرن وەگەردم

Ciwanî kuç kird le ‘umir û giyanim
Pîrî hat nîşte pus û soqanim
Henasem sengîn, pel û pûm rizya
Kes eram nemen xoda ley donyay gewra
Rûh û giyanim herdig perîşan
Çeweylim kem sû xoda des û pam lerzan

Dî kesêg nîye bigrî xewerim
Tenyayî biyese bimirim serkîşî kerim
Şewekî ta şew çewim ha we der
Belkem kesî bay bimirim bikeydeme ser
Beşkem yekêg bay bûde hawdemim
Kemî kem bikey le derd û xemim

Hey dad kes nîye der we rûm wa key
Xem û tenyayî wey wey we lîm ciya key
Hawar û bîdad wey bî kesîme
Çimanî le yad gişt dinya çîme
Çû darê wişkîg tiyenî waranim
Pir le diltengî dem êwaranim

Rencê bêwer û henasey serdim
Dî mang û xwerîş qehrin wegerdim