site loader
Song image

پیری موغان – نەجمەدین غوڵامی

By - نەجمەدین غوڵامی Necmedîn Xulamî

لە دەوری پیری مەیخانە سەدایی موتریبان با بێ

لە تاریکی شەوی هیجران چرای دەفعی خەمان با بێ

لە ناو بەزمی حەریفانا لە زومرەی بەزمی ڕندانا

لە ناڵینی غەریبانا دەوای دەردی دڵان با بێ

لە بەر ناڵەی حەزینی من لە بەر شین و گرینی من

لە بەر دەردی برینی من نەسیمی هەم زەبان با بێ

غوڵامی سەروی باڵاتم ئەسیری زولفی تاتاتم

شەهیدی چاوی شەهلاتم قڕانی ئاشقان با بێ

لە هیجرانی خەزان تا کەی بە ئومیدی گوڵان تا کەی

لە نەغمەی بوڵبوڵان تا کەی دەبا فەسڵی گوڵان با بێ

زەمانە بەزمی ڕندانە بدە ساقی بە پەیمانە

لە بەر تەعزیمی مەیخانە بڵێن پیری موغان با بێ

نەماوە حاڵەت و ژینم لە دەس چوو ڕۆحی شیرینم

ڕەفێقان بێن بکەن شینم سەدای گریە و فوغان با بێ

کە ئاشق قوڕبەسەر ماوە سەراپا غەرقی خوێناوە

ئەڵێن دووبارە کوژراوە تەبیبی حاڵزان با بێ

کۆپی کردن بێ ئاماژەدان بە سەرچاوە قەدەغەیە
More

وەڵامێک بنووسە

پۆستی ئەلیکترۆنییەکەت بڵاوناکرێتەوە. خانە پێویستەکان دەستنیشانکراون بە *

Similar Tracks