زەوی ئێستاش لە ڕووت ھەڵدێ بدەی سووڕ
نەڕووخای ئاسمانی پیری پشت کووڕ
کە سۆمایی لە چاو باوکان بڕاوە
بەرۆکی پیرەدایکان دادڕاوە
وەتەن قەوم و کەس و کار
وەتەن ھۆی ژین و ژیوار
وەتەن ئامێز و دڵدار
وەتەن بۆت دەمرم ئەمجار

بە ناحەق خوێنی تێکۆشەر دەڕێژن
شەھیدی بێ سەر و بێ شوێن دەنێژن
کە کوندی شووم لە گوندی کورد دەخوێنێ
کە گەنجی کورد دەگەوزێنێ لە خوێنێ
وەتەن گیان و دڵی دایە
وەتەن دەینت لە ملمایە
سەری بێ نرخ و بێ مایە
لەپێناوی وەتەندایە

دەبا باش تێ بگا ئەو دوژمنەی پەست
ڕەوەز ورد ناکرێ ھەرگیز بە داردەست
دەبێ کوند ھەر بەرەو وێرانە بفڕێ
ھەڵۆ لەو شاخە سەربەرزانە نەبڕێ
وەتەن قەوم و کەس و کار
وەتەن ھۆی ژیرن و ژیوار
وەتەن ئامێز و دڵدار
وەتەن بۆت دەمرم ئەمجار

ئەگەر مردم وەتەن لاوانی تۆ خۆش
ئەگەر زاڵم نەما دەورانی تۆ خۆش
موخەیەر بم لە بەینی تۆ و بەھەشتا
لە جەننەت دوور ئەبم سەیرانی تۆ خۆش
ئەگەر خۆ قانعی ئەمڕۆ نەمێنێ
وەتەن! ڕەببی وەتەن خاهانی تۆ خۆش
Zewî êstaş le rût heldê bidey sûr
Nerûxay asimanî pîrî pişt kûr
Ke somayî le çaw bawkan birawe
Berokî pîredaykan dadirawe
Weten qewm û kes û kar
Weten hoy jîn û jîwar
Weten amêz û dildar
Weten bot demrim emcar

Be naheq xwênî têkoşer derêjn
Şehîdî bê ser û bê şwên denêjn
Ke kundî şûm le gundî kurd dexwênê
Ke gencî kurd degewzênê le xwênê
Weten giyan û dilî daye
Weten deiynt le milmaye
Serî bê nirx û bê maye
Le pênawî wetendaye

Deba baş tê biga ew dujminey pest
Rewez wird nakirê hergîz be dardest
Debê kund her berew wêrane bifrê
Helo lew şaxe serberzane nebrê
Weten qewm û kes û kar
Weten hoy jîn û jîwar
Weten amêz û dildar
Weten bot demrim emcar

Eger mirdim weten lawanî to xoş
Eger zalim nema dewranî to xoş
Muxeyer bim le beynî to û beheşta
Le cennet dûr ebim seyranî to xoş
Eger xo qan’î emro nemênê
Weten! Rebbî weten xahanî to xoş