مەقام

قەلبی من چەشنی لالە بێت و نەوتی تێ بکەن

ئاگری دوژمن بێتە گیانم وەک چرا من پێ بکەن

شەقشەقی کەن گۆشت و ئێسقان یەک بە یەک خوێی تێ بکەن

بێ ترس من دێمە مەیدان حوکمە ئازادیم دەوێ

گەر نەسووتێم و نەخنکێم چۆن هەژارم سەرکەوێ

نەچمە ناو جەرگی هەژار و شانبەشانی وەک برا

ڕۆح و لاشەم ئیش نەکا بۆ میللەتێکی حەق خورا

بەو شەوی پڕ ترس و تاریک من نەسووتێم وەک چرا

کۆمەڵی دامای هەژاران چۆن دەبینن بچنە پێش

لێم گەڕێن من با بسووتێم ببمە خاک و خۆڵەمێش

ببمە خاک و خۆڵەمێش با تا هەژارم پێ بگا

با بسووتێم بەڵکە گەنج و لاوەکانم تێ بگا

بێتە مەیدان خوێن بڕێژی تا حەقی خۆی پێ بگا

تا بزانێ غەرقی خوێنە کێ حەقی وی خواردووە

با لەبۆ حەق خوێن بڕێژێ دەرچێ دوژمن تا زووە

سامی قوربانی گەلت بە و قەت مەژی بەو زیللەتە

هەرکەسێ بمرێ لە ڕێگای نیشتمان و میللەتە

نامرێ هەرگیز دەمێنێ چونکە خاوەن غیرەتە

خۆت بە قوربانی گەلت کە و فەرزە قوربانی لەبۆ

نیشتمانی حوڕ و سەربەست ئومەتێکی سەربەخۆ

گۆرانی

هەی نار هەی نار باوانم یار

هات و ڕۆیی بە لەنجە و لار

قوربانت بم چاو ئەستێرە

خزمەتێکمان پێ بسپێرە

هەر ئەمشەومان ماوە لێرە

هەی نار هەی نار باوانم یار

هات و ڕۆیی بە لەنجە و لار