نەمردم من ئەگەر ئەمجارە بێ تۆ

نەچم شەرت بێ هەتا ئەو خوارە بێ تۆ

دەروونم خاڵییە وەک نەی دەناڵێ

هەوارێکی چ پڕ هاوارە بێ تۆ

بیناییم کوێرە هەڵنایە بە ڕووی کەس

موژەم یەک یەک ئەڵێی بزمارە بێ تۆ

قەسەم بەو شەربەتی دیداری پاکت

شەڕابم عەینی ژەهری مارە بێ تۆ

لە کن تۆ خار و خەس گوڵزارە بێ من

لە کن من خەرمەنی گوڵ خارە بێ تۆ

لە کن من با وجوودی ناس و ئەجناس

کەسی تێدا نییە ئەم شارە بێ تۆ

هەتا تۆم ئاشنا بووی، ئاشنام بوون

ئەمێستا موو بە مووم ئەغیارە بێ تۆ

هەموو ڕۆژێ لە تاو هیجرانی ئەمساڵ

تەمەننای مردنی پێرارە بێ تۆ

لە حەسرەت سەروی قەددت چاوی نالی

دوو جۆگە، بەڵکوو دوو ڕووبارە بێ تۆ

Nemirdim min eger emcare bê to

Neçim şert bê heta ew xware bê to

Derûnim xalîye wek ney denalê

Hewarêkî çi pir haware bê to

Bînayîm kwêre helnaye be rûy kes

Mujem yek yek elêy bizmare bê to

Qesem bew şerbetî dîdarî pakit

Şerabim eynî jehrî mare bê to

Le kin to xar û xes gulzare bê min

Le kin min xermenî gul xare bê to

Le kin min ba wicûdî nas û ecnas

Kesî têda nîye em şare bê to

Heta tom aşina bûy, aşinam bûn

Emêsta mû be mûm exyare bê to

Hemû rojê le taw hîcranî emsal

Temenay mirdinî pêrare bê to

Le hesret serwî qedit çawî Nalî

Dû coge, belkû dû rûbare bê to