مانگی ڕوخسار – عەدنان کەریم

لە پەرچەمتایە دڵ شانەی مەکە لانەی مەشێوێنە
لەگەڵما گیانەکەم تووبی خوا ئەم جەورە مەنوێنە
خوا نەکردە نەک بگرێ هەناسەم مانگی ڕوخسارت
لەسەر ماچێ دڵی ئەم بەندە پیرەی خۆت مەڕەنجێنە
لەسەر ماچێ دڵی ئەم بەندە عاشقەی خۆت مەڕەنجێنە

نەکا بۆ خزمەتی ئەو شۆخە چووبێ دڵ ئەمان یاران
سۆراخێ کەن لە سینەمدا دەمێکە بێ سەروشوێنە
لە داوی پەرچەمی ئەو شۆخەدا زەحمەت دڵم دەربێ
سەراپا هەر شەکەنج و پێچ و تاب و حەڵقە و چینە
زەمانە مەیلی ساردە گەر لەگەڵما من نییە باکم
شوکر یارم لەگەڵما مەیلی وا گەرمایی هاوینە
قسەی عەشقی من و تۆ داستانێکە نییە وێنەی
نەوەک مەجنوون و لەیلایە نەوەک فەرهاد و شیرینە
لە پەرچەمتایە دڵ شانەی مەکە لانەی مەشێوێنە
لەگەڵما گیانەکەم تووبی خوا ئەم جەورە مەنوێنە

کۆپی کردن بێ ئاماژەدان بە سەرچاوە قەدەغەیە

✓ عەدنان کەریم ✓ مانگی ڕوخسار