شەش پەپوولەکەی گۆشەی باخەکەم
هەر بۆ ئێوەیە ئاخ و داخەکەم
هەر بۆ ئێوە لێو بە باری خەمم
بولبولی بەستە و گریە و ماتەمم
هەر وەکوو پاییز ڕەنگزەردی ئێوەم
داخی دەروون پڕ لە دەردی ئێوەم
خەمی ئێوەیە خەو و خۆراکم
شەوی تاریکە ڕۆژی ڕووناکم
بەرد ئەسووتێنێ گەرمی هەناسەم
بە سۆزی دڵ و ئاگری تاسەم
هاوار و ناڵەی مات و بێدەنگم
خورپە و لێدانی دڵەکەی تەنگم
شەش پەپوولەکەی گۆشەی باخەکەم

شەش پەپوولەکەی گۆشەی باخەکەم
هەر بۆ ئێوەیە ئاخ و داخەکەم
لەو ڕۆژەوە من دوورم لە ئێوە
هەر خۆم ئەزانم دڵ چەن پەشێوە
هەر خۆم ئەزانم کام بڵێسەی خەم
لە دەروونەوە بەر بۆتە جەسەم
هەر خۆم ئەزانم دەردی دڵی خۆم
توخوا با هەر خۆم بۆ خۆم خەم بخۆم
هەر خۆم ئەزانم چەن بە سەرسامی
گرتوومە ملی ڕێی بێئارامی
دەست لە ناو دەستی دڵی ڕەنجەڕۆم
بە ڕێی دڕکاوی مەینەتا ئەڕۆم
شەش پەپوولەکەی گۆشەی باخەکەم

شەش پەپوولەکەی گۆشەی باخەکەم
هەر بۆ ئێوەیە ئاخ و داخەکەم
دەستە بە دەستە باخەوانەکان
ئەگەڕێنەوە بەرەو باخەکان
موژدە بێ موژدە بێمەوە لاتان
ئەکەم بژاری باخچەی هیواتان
شاد ئەبینەوە ئەمڕۆ یا سبەی
ئاوات، خۆزگە، خەو، ئەبن بە ئۆخەی
ئەژین ژیانێ هەموو ئۆخەی بێ
هەرچی پێ بڵێی خەفەت ئەو نەیبێ
پەپوولەکانم، پەپوولەی ئازیز
وا بە سەر ئەچێ ماتەمی پاییز
شەش پەپوولەکەی گۆشەی باخەکەم

Şeş pepûlekey goşey baxekem
Her bo êweye ax û daxekem
Her bo êwe lêw be barî xemim
Bulbulî beste û girye û matemim
Her wekû payîz rengzerdî êwem
Daxî derûn pir le derdî êwem
Xemî êweye xew û xorakim
Şewî tarîke rojî rûnakim
Berd esûtênê germî henasem
Be sozî dil û agirî tasem
Hawar û naley mat û bêdengim
Xurpe û lêdanî dilekey tengim
Şeş pepûlekey goşey baxekem

Şeş pepûlekey goşey baxekem
Her bo êweye ax û daxekem
Lew rojewe min dûrim le êwe
Her xom ezanim dil çen peşêwe
Her xom ezanim kam bilêsey xem
Le derûnewe ber bote cesem
Her xom ezanim derdî dilî xom
Tuxwa ba her xom bo xom xem bxom
Her xom ezanim çen be sersamî
Girtûme milî rêy bê aramî
Dest le naw destî dilî rencerom
Be rêy dirkawî meyneta erom
Şeş pepûlekey goşey baxekem

Şeş pepûlekey goşey baxekem
Her bo êweye ax û daxekem
Deste be deste baxewanekan
Egerênewe berew baxekan
Mujde bê mujde bêmewe latan
Ekem bjarî baxçey hîwatan
Şad ebînewe emro ya sibey
Awat, xozge, xew, ebin be oxey
Ejîn jiyanê hemû oxey bê
Herçî pê bilêy xefet ew neybê
Pepûlekanim, pepûley azîz
Wa be ser eçê matemî payîz
Şeş pepûlekey goşey baxekem