site loader
site loader
Song image

شیرین بەهارە

By - تاهیر تۆفیق Tahîr Tofîq

شیرین بەهارە بەهاری شادان
بێبەهرەن لە ژین گەل نامرادان
جەژن و بەهار و سەیران و خۆشیی
گشتی پیرۆزی گەردن ئازادان

شیرین ئەزانم کە تۆش زامداری
وەک من عەوداڵی خونچەی بەهاری
هیوای تۆ یەکە هیوای من هەزار
من بێزار نەبم تۆ بۆ بێزاری

مەژی بۆ مردن بمرە بۆ ژیان
چۆن قازانج ئەکەی تا نەکەی زیان
لە زڕەی زنجیر دڵت نەلەرزێ
پێوەند بۆ لەشە نەوەک بۆ گیان

بێ دابنیشین لە بن هەناران
کۆڕێ ببەستین چون مەی گوساران
با ساتێ ناوی لە یادا نەبێ
مەرگی جوانان گریەی هەژاران

بێ دابنیشین لە بن داری بەی
نەختێ بنۆشین لە خۆشاوی مەی
ئەوجا دەزانی کامیان جوانن
بەی ڕەنگی گەردن مەی ڕەنگی گۆنان

بێ با بۆت بکەم باسی جوانیم
ڕۆژانی بەرخیم شەوانی شوانیم
کۆرپەی ئازیز بووم شوانکارەی شادی
ژیام بە خۆشی هەتا توانیم

ژیام سەردەمێ بە کەیف و خۆشی
بە شادی کڕین بە خەم فرۆشی
تاکو پێمکرا شەرابم نۆشی
هەتا توانیم ڕوومەتیم مژی

ئەوساکە چوومە ڕیزی دڵداران
پێی وتم سەردار هۆزی هەژاران
بێ دابنیشین لە بن دیواران
زنجیر لە گەردن چوون گونەهکاران

شیرین هەتا کەی دووریت بچێژم
فرمێسکی خوێنین تا کەی بڕێژم
تاکەی لە گۆشەی دڵی زارمدا
خونچەی جوانی و گەنجی بنێژم

بێ دابنیشین دیدە پڕ ئەسرین
تۆ بگری بۆ خۆت منیش بۆ شیرین
وا بەهاریش هات کەژ و کێو ڕەنگین
دڵەی عالەم شاد دڵەی خۆم غەمگین

Şîrîn behare beharî şadan

Bêbehren le jîn gel namiradan

Cejn û behar û seyran û xoşîy

Giştî pîrozî gerdin azadan

Şîrîn ezanim ke toş zamdarî

Wek min ewdalî xunçey beharî

Hîway to yeke hîway min hezar

Min bêzar nebim to bo bêzarî

Mejî bo mirdin bimre bo jiyan

Çon qazanc ekey ta nekey ziyan

Le zirey zincîr dilit nelerzê

Pêwend bo leşe newek bo giyan

Bê dabinîşîn le bin henaran

Korê bibestîn çun mey gusaran

Ba satê nawî le yada nebê

Mergî ciwanan giryey hejaran

Bê dabinîşîn le bin darî bey

Nextê binoşîn le xoşawî mey

Ewca dezanî kamyan ciwanin

Bey rengî gerdin mey rengî gonan

Bê ba bot bikem basî ciwanîm

Rojanî berxîm şewanî şwanîm

Korpey azîz bûm şwankarey şadî

Jiyam be xoşî heta twanîm

Jiyam serdemê be keyf û xoşî

Be şadî kirîn be xem firoşî

Taku pêmkira şerabim noşî

Heta twanîm rûmetîm mijî

Ewsake çûme rîzî dildaran

Pêy witim serdar hozî hejaran

Bê dabinîşîn le bin dîwaran

Zincîr le gerdin çûn gunehkaran

Şîrîn heta key dûrît biçêjim

Firmêskî xwênîn ta key birêjim

Takey le goşey dilî zarimda

Xunçey ciwanî û gencî binêjim

Bê dabinîşîn dîde pir esrîn

To bigrî bo xot minîş bo Şîrîn

Wa beharîş hat kej û kêw rengîn

Diley alem şad diley xom xemgîn

کۆپی کردن بێ ئاماژەدان بە سەرچاوە قەدەغەیە
More

وەڵامێک بنووسە

پۆستی ئەلکترۆنیکەت بڵاو ناکرێتەوە .

Similar Tracks