گوڵوەنی بەسەی خەزاڵ خەرامان
دیاری نییە چووڵ کرد لە میلکان
نە هاوزوانیگ نە کەس تیەیدە لام
غەریبم لە خوەم لە خوەیشگ و برام
خەمێ من، ژانم، ژانێ ژیانە
هەناسەی پڕدەرد پەژارەی ژانە
خەمێ خاکەگەم لە گشت گرانتر
کەس نییە هاودەم ماڵێ سەرد و سڕ

ژانێ مەردمێ فەقیر و کەمدەس
فەرهەنگێ کوشیا زوان گریەبەس
ژان خو کەم نییە لا چوارلاوە خەم
ئەر پشتم نەگری خەم وە چە لاوەم
خەمێ من، ژانم، ژانێ ژیانە
هەناسەی پڕدەرد پەژارەی ژانە
خەمێ خاکەگەم لە گشت گرانتر
کەس نییە هاودەم ماڵێ سەرد و سڕ

ئمڕوو من و تۆ چۊن دۆ هاوزوان
چۊ بڕبڕەی پشت هەر لە دڵ و گیان
ئەڕای نەیشتنێ خەم و خوسە و ژان
لە خەو هەڵسیم گشکەسەی باوان
خەمێ من، ژانم، ژانێ ژیانە
هەناسەی پڕدەرد پەژارەی ژانە
خەمێ خاکەگەم لە گشت گرانتر
کەس نییە هاودەم ماڵێ سەرد و سڕ