گوڵوەنی بەسەی خەزاڵ خەرامان
دیاری نییە چوڵ کردە میلکان
نە هاوزوانی نە کەس تیەیدە لام
غەریبم لە خوەم لە خوەیشگ و برام
خەمێ من، ژانم، ژانێ ژیانە
هەناسەی پڕ دەرد پەژارەی ژانە
خەمێ خاکەگەم لە گشت گرانتر
کەس نییە هاودەرد ماڵێ سەرد و سڕ

ژانێ مەردمێ فەقیر و کەمدەس
فەرهەنگێ کوشیا زوان گریە بەس
ژان خو کەم نییە لە چوارلاوە خەم
ئەر پشتم نەگری خەم وە چە لاوەم
خەمێ من، ژانم، ژانێ ژیانە
هەناسەی پڕ دەرد پەژارەی ژانە
خەمێ خاکەگەم لە گشت گرانتر
کەس نییە هاودەرد ماڵێ سەرد و سڕ

ئمڕوو من و تۆ چۊن دوو هاوزوان
چۊ بڕبڕەی پشت هەر لە دڵ و گیان
ئەڕای نەیشتنێ خەم و خوسە و ژان
لە خەو هەڵسیم گشتکەسەی باوان
خەمێ من، ژانم، ژانێ ژیانە
هەناسەی پڕ دەرد پەژارەی ژانە
خەمێ خاکەگەم لە گشت گرانتر
کەس نییە هاودەرد ماڵێ سەرد و سڕ