دەستم بگرن بمبەن لەگەڵ خۆتان
ڕێبوارێکم من هاتووم لەگەڵتان
بە تەنیا جێم مەهێڵن، ئەمشەو زریان ئەمچێنێ
تەم و مژ دامئەپۆشێ و مانگەشەو دەمڕفێنێ
دەستم بگرن بمبەن لەگەڵ خۆتان
ڕێبوارێکم من هاتووم لەگەڵتان

کێ دەیزانی کە ئاوا تەناف هەڵخەن بۆ شارێ
دەستی شەقامیش ببڕن، کۆڵان بدەن لە دارێ
لاوێکی شەرمەون بووم مێشکم ئەدرا بە ماران
ئێستاش کە پیر و ماندووم دەرم دەکەن لە شاران
دەستم بگرن بمبەن لەگەڵ خۆتان
ڕێبوارێکم من هاتووم لەگەڵتان

کێ دەیزانی کە ڕۆژێ من دەکرێم بە گۆرانی
دەمەو بەهار دێمەوە دەچمۆ ناو ئاوی کانی
گەرووم بە گزنگ تەڕ کەن، زامەکانم بە شیلان
بە گۆرانی دامپۆشن یا بە سەوزی دارستان
دەستم بگرن بمبەن لەگەڵ خۆتان
ڕێبوارێکم من هاتووم لەگەڵتان

وا بەهار هات بەڕێوە بەزم و خۆشی هاپێوە
بەشکەم گزنگی بەیان ڕووناک کا دڵی ئێوە
بەهار وا هات بەڕێوە بەزم و خۆشی هاپێوە
بەشکەم گزنگی بەیان ڕووناک کا دڵی ئێوە
دەستم بگرن بمبەن لەگەڵ خۆتان
ڕێبوارێکم من هاتووم لەگەڵتان