ئێوارەیە وا هەڵگرە سا گۆزەیی تازە
رێی کانی ئەوا، مونتەزیری جیلوەیی نازە
بەر دەرگەکەتان قیبلەیی رووی ئەهلی نیازە
ئێوارەیە وا هەڵگرە سا گۆزەیی تازە

سەر جادە موعەتەر کە به بۆی خونچە و مێخەک
بەو لەنجەیەوە بەستە بڵێت ورشەیی خامەک
هاڕەی کەمەرە و پڵپڵە و گوارە و کرمەک
ئێوارەیە وا هەڵگرە سا گۆزەیی تازە

چەن جوانی بەرەو مەغریب ئەچی زەردە ئەدا لێت
پرشنگی خشڵ ئەبڵەق ئەکا دەوروبەری رێت
ڕۆژی دەمی کەل حازرە بۆ پێشکەشی بەر پێت
ئێوارەیە وا هەڵگرە سا گۆزەیی تازە

ئێوارەیە وا دەرکەوە سا جوانە کچی دێ
ئەی وێردی قسە و بەستەیی گشت کوڕەگەلی سەر ڕێ
سووتاوی جوانیتن هەموو کێیی کوڕی کێ
ئێوارەیە وا هەڵگرە سا گۆزەیی تازە

وەک سوێسکە بڕۆ، ئاسکە نیگای چاوی ڕەش و مەست
پڕ عیشوە بچەرخێنە، ئیتر هیچ مەبە دەربەست
چەن ماڵ ئەڕمی، چەن شل ئەبێ هێزی دڵ و دەست
ئێوارەیە وا هەڵگرە سا گۆزەیی تازە

وەختێ کە ئەکەی چەشنی نەسیم لەنجە بەرەو ماڵ
ئەگریجەی تەڕ پەخشە لەسەر کوڵم و خەت و خاڵ
شەڕیانە شەماڵ، پەنجە لەسەر ڕەنگی ڕەش و ئاڵ
ئێوارەیە وا هەڵگرە سا گۆزەیی تازە

Êwareye wa helgire sa gozeyî taze
Rêy kanî ewa, muntezîrî cîlweyî naze
Ber dergeketan qîbleyî rûy ehlî niyaze
Êwareye wa helgire sa gozeyî taze

Ser cade mueter ke be boy xunçe û mêxek
Bew lenceyewe beste bilêt wirşeyî xamek
Harey kemere û pilpile û gware û kirmek
Êwareye wa helgire sa gozeyî taze

Çen ciwanî berew mexrîb eçî zerde eda lêt
Pirşinigî xişil ebleq eka dewruberî rêt
Rojî demî kel hazire bo pêşkeşî ber pêt
Êwareye wa helgire sa gozeyî taze

Êwareye wa derkewe sa ciwane kiçî dê
Ey wêrdî qise û besteyî gişt kuregelî ser rê
Sûtawî ciwanîtin hemû kêyî kurî kê
Êwareye wa helgire sa gozeyî taze

Wek swêske biro, aske nîgay çawî reş û mest
Pir îşwe biçerxêne, îtir hîç mebe derbest
Çen mal ermî, çen şil ebê hêzî dil û dest
Êwareye wa helgire sa gozeyî taze

Wextê ke ekey çeşnî nesîm lence berew mal
Egrîcey ter pexşe leser kulm û xet û xal
Şeryane şemal, pence leser rengî reş û al
Êwareye wa helgire sa gozeyî taze